كود الرباط//

كتعيش الهرهورة، المدينة الساحلية الجميلة القريبة من الرباط، على وقع الفوضى وغياب المراقبة واستمرار السكن العشوائي، رغم مجهودات دارتها السلطات الولائية من خلال هدم عدد من البنيات غير القانونية بما فيها مقهى شيشا معروف وبيران كيتحداو القانون.

الغريب فهاد المدينة، هو فاش تزورها، كتلقا شواطئ عامرا أزبال (حسب صور توصلت بها “كود”)، وهادي مسؤولية الجماعة الترابية لمدينة الهرهورة لي كيسيرها حزب الاستقلال، فالمقابل كتلقا مالين الفيلات والمرفحين خصوصا بعض الشخصيات كيجيو عندهم عمال النظافة ديال الجماعة بشكل يومي وينظفو ليهم الاحياء وكولشي.

فالمقابل الاماكن لي كيمشي ليها شعيبة، النظافة ناقصا بزاف، والدليل شوفو الطرقان والشواطئ كلها على الطريق الساحلي.

وسبق لوسائل إعلام أن كشفت عن تخصيص عدد من المستخدمين في قطاع النظافة، لخدمة حدائق فيلات لشخصيات سياسية معروفة، مع تنظيف الطرق المجاورة لإقامة الشخصيات، أما الأحياء والأزقة التي يسكنها المواطنون فيها الوسخ ونقط سوداء واحيانا حفار.

فواحد المنطقة بمدينة الهرهورة ولي عرفات تشييد بنايات غير قانونية، وتم هدمها بقرار من السلطات، لقات “كود” جوج حفاري حدا حانوت كيتقضاو منو ناس، وحسب شهادات الساكنة ديما كيطيحو فيهم دراري صغار، والغريب ما عمر الجماعة جات وصلحات دوك الحفاري.

وفي نفس المنطقة كاينين بقايا الهدم فوق سطوح العمارات بلا اصلاح ولا ترياب، من نهار جات السلطة وهدمات البنيات لي تزادت فوق العمارات، كما توضح الصور لي كتوفر عند “كود”.

وللي زاد غضب المصطافين والمواطنين هاد العام هو الزيادة في تعريفة مواقف السيارات قرب الشواطئ وفي الشوارع، خصوصا فالصيف كتعرف المدينة اقبال كبير، وهادشي كيعني ان الجماعة بغات تدخل مداخيل كبيرة على ظهر المصطافين.

وفرضت الجماعة تعريفة جديدة من 5 دراهم لأقل من ساعة إلى 23 درهما لليوم، مع الرفع من مبلغ الانخراط إلى 400 درهما نهارا و500 درهم ليلا، دون تداول القرار في دورة المجلس، مما اعتبرتها المعارضة أثمنة مبالغ فيها وغير مقبولة، وتحظى بموافقة أعضاء المجلس المفروض عليه التداول في كيفية تدبير المواقف العمومية والشوارع.

ولكن يلا عرفتو كيفاش كيتجمعو فلوس ديال الباركينغ، غادي تصدمو، بحيث الجماعة استعانت بصحاب الجيليات وعطات الاذن باسم الجماعة باش يجمعو فلوس عند المواطنين بطريقة عشوائية.

لبارح شافت “كود” منظر لهاد النوع من ابتزاز مالين الجيليات، وسط الهرهورة، مول الجيل طلب من صاحب سيارة تقطع التيكي لي فيها 5 دراهم، ورفضات بمبرر بلي هي كتخلص فقط شركة التنمية المحلية ماشي مجهولين لابسين جيلي مكتوب فيه جماعة الهرهورة.

كيفاش يتم استخلاص هاد الاموال وكيفاش تيكي ممكن يتزور بسهولة غاتكون فيه شفافية فجمع الاموال ديال الباركينغات للي ممكن توصل مداخيلاها فبعض الشواطئ لأكثر من 3000 درهم فنهار. فوضى كبيرة خصها تحقيق.

يشار بلي مدينة الهرهورة في عهد الاستقلالي فوزي بنعلال، فاش كان رئيس الجماعة، عرفات خروقات خطيرة وبنايات عشوائية وتوزيع تراخيص بالمحسوبية والزبونية، وزيد عليها مافيا الكوكايين لي تفرشو فها المدينة.

غير هو الخليف ديال بنعلال، لي حتى هو استقلالي، محمد لخريف، مخلي المدينة غادا للأسوأ فجميع الخدمات من النظافة للباركينك واصلاح الطرق فالشوارع خصوصا.