هشام أعناجي ـ كود الرباط//

أكد عدد من سكان إقامة رياض جاردن، شارع محمد السادس قبالة ورش مشروع morroco  mall لـ”كود” أن منازلهم تضررت بشكل كبير جراء الزلزال الأخير، رغم أن البناء كان حديثا وبمواصفات تقنية عالية لكنها لم تحترم في أغلبها.

وحسب وثائق وشهادات حصلت عليها “كود” فإن تسليم هذه الشقق بدأ منذ 2019. والثمن يتراوح بين 15 و19 ألف درهم للمتر المربع.

وبعد تسلم السكان للشقق، بان لهم بلي كاينا شبهات غش فالبني، وهادشي أكداتو خبرة دارها مكتب دراسات، وفق وثائق توصلت بها “كود”.

شقق بـ170 مليون، بان عيبها نهار الزلزال، تشققات كثيرة على مستوى 22 عمارة، وفكل عمارة كاينا 12 شقة. تضررو بزاف الديور السفلية وليطاج لول.

الصور والخبرة اللي اطلعت عليها “كود”، بعض الحيوط مافيهمش مرطوب ديريكت الصباغة والبعض الآخر نسبة السيما قليلة وزيد عليها غش فحاجات تقنية ذكرها تقرير الخبرة.

ومن بين الاختلالات فالبني حسب الوثائق لي عند “كود”، مكايناش أدوات قوية لربط البناء، وكاينا تشققات بين البوطوات والجدران، ولقاو بلي كاين  تكسير عمودي ومتدرج، وجدران المطبخ تفركعو،  تشققات في الواجهة.

هاد التجمع السكاني اللي غالي، ديال الشعبي للإسكان، بان عيوبو، الشركة حسب شهادات من السكان كتعرقل مسطرة المتابعة القضائية لي بغاو يديرو ضدها، مبغاتش تسلم ليهم بعض الوثائق للي ضرورية في الملف.

ويقول واحد من السكان فاتصال مع “كود”: “الفاصاد ديال التجمع تشقق، وباش مايتفضحش هادشي ناضت الشركة كترمم الواجهات وخلات الداخل رايب”، مضيفا: “بزاف ديال الناس كيباتو برا حاليا، الشركة مدارتش حتى خطوة باش تصلح الديور أو تعطينا علاش ولات هكا رغم أننا حطينا فلوس كثيرة باش تكون عندنا سكنى مزيانة”.