كود سبور//

خلقت وكالة مكلفة بترويج مجسم كاس العالم 2026، اللي جابو واحد السبونسور ديال الاتحاد الدولي لكرة القدم إلى المغرب، فضيحة وشوهة كبيرة، يوم الجمعة 2 ماي 2025، بمدينة الدار البيضاء، خلال استقبال المجسم.

وفالوقت اللي المغرب غادي وكايهيكل القطاعات والمجالات باش يزيد بها للقدام، ويحفظ كرامة الفاعلين فيها، ومن بينها الإعلام والتواصل، لضمان منتوج إعلامي قادر على منح إشعاع للمملكة إقليميا ودوليا، جات هذه الوكالة المكلفة بالتواصل، وبدات تضرب هذه المجهودات فالزيرو، وفبلاصة ما توجه الدعوة للمنابر الإعلامية والصحافيين لتغطية حدث الترويج لمجسم كاس العالم، مشات عيطت على شي “مؤثرين” واخا هاد الوصف ديال “مؤثر” فالمغرب راه يناقش، وكلمة صعيبة شويا توصف بها شي واحد غير حيث كايبان بزاف فليريزو سوسيو، المهم عيطت هذه الوكالة على “المؤثرين” وقصات اغلب الصحافيين ووسائل الإعلام، والغريب انها خلات شي (نجارة) من المتطفلين على الصحافة، حتى هما يدخلو واخا ما عندهمش البطائق المهنية للصحافة، فخطوة غريبة بزاف من وكالة تواصل المفروض فيها تساهم فهيكلة القطاع، ولكن هي بالمقابل منعت اغلب الصحافيين يحضرو، واخا عندهم بطائق المجلس الوطني للصحافة وحبسوهم فالباب وقالو لهم راه اسم المنبر ديالكم ما كاينش فلاليست.

هذا الحادث والفضيحة، راه كايفرضو على وزارة الاتصال والوزير مهدي بنسعيد اللي ضسرو “المؤثرين” فالوقت ديالو، (كايفروضو عليهم) اعادة النظر فطريقة عمل هاد وكالات التواصل، حيث راه عيب ان مجسم كاس العالم يجي للمغرب، والمفروض يحضرو الصحافيين لتغطية هذا الحفل، لتسويق هذا الحدث وإعطاء صورة زوينة على المغرب انه بلد ديال الكورة والرياضة، خصوصا وان هاد الصحافين اللي تمنعو فيهم اللي دارو تغطيات صحافية لسنوات فالملاعب الوطنية والأفريقية والعربية والملاعب العالمية، ولكن لقاو ريوسهم محبوسين فالباب من طرف هذه الوكالة اللي منعتهم يدخلو، وكايشوفو “مؤثرين” من صحاب فيديوات يوتيوب وفيسبوك وتيكتوك وإنستغرام داخلين لعند مجسم كاس العالم بالفور يا الشيفور، وكاين اللي فيهم ما قاري حتى القرايا، وحاضرين هذا الحدث بدون اي اضافة، وهنا السؤال اللي خاص يتطرح على الوزير بنسعيد “واش هاد صحاب مواقع التواصل الاجتماعي هما اللي معول عليهم يروجو لمونديال 2030 يا مول شعار حكومة المونديال؟”، وراه حتى السبونسور اللي جايب كاس العالم إلى كان فعلا باغي يروج الاسم ديالو ويكبر فالسوق المغربية، ما غايعبجوش هذا الشي اللي دارت هاد وكالة التواصل اللي ما عندهاش مبرر لهاد الفضيحة اللي دارت.