گود سبور//

قررت لجنة التأديب فالعصبة الوطنية لكرة القدم الاحترافية، معاقبة لاعب وداد تمارة عثمان صبري بسبب طريقة الاحتفال ديالو بالهدف اللي ماركاه على الوداد الرياضي ضمن الدورة الأولى من البطولة الاحترافية.

وتعاقب عثمان صبري لاعب وداد تمارة وتوقف 2 ماتشات ما يلعبهومش وغرامة، حيث احتفل بالهدف بطريقة شد فيها يديه ودوزها على العنق ديالو، زعما راه قتل الماتش ضد الوداد.

الغريب هو أن عثمان صبري ماشي أول شخصية معروفة دارت هاد الحركة، ومن غير بزاف د اللاعبين اللي كايديرو هذه الحركة، راه رئيسة الحكومة الجديدة المعينة فاطمة الزهراء المنصوري، فايت لها دارت حركة بحال اللي دار اللاعب، فواحد المؤتمر قديم لحزب الأصالة والمعاصرة.

وكانت بنت الباشا خرجت وشرحت شنو قصدت بهاديك الحركة، وقالت: “الكاتبة ديال الحزب سولتها واش من ورا الندوة غادي تدير اجتماع، وجاوبتها بهاديك الإشارة المعروفة فالعالم (تدويزت اليد على العنق) زعمة راه ورا هذا الاجتماع غادي نحبسو، وردوني ذباحة ووشناقة سامحهم الله وأنا اللي عليا هو حب الوطن”.

دابا السؤال هنا واش لاعب وداد تمارة يستاهل هذه العقوبة حيث احتفل بهاد الطريقة ؟