كود الرباط ///

اليوم الاثنين 29 ابريل 2024 مع لحداش توقيت مدريد العشرة توقيت الرباط پيدرو سانشيث رئيس الحكومة الصبليوني غادي يقرر واش غادي يبقى فقيادة بلادو ولا غادي يستاقل.

اليوم حددو هو. لحد الان ما تسرب والو لوسائل الاعلام المحلية. سانشيث علن لاربعا للي فات وحدد 5 ايام للتفكير فالقرار اللي يشوفو مناسب ليه. جمد انشطتو كلها. شي وحدين من المقربين ليه كانو متشائمين وقالو باللي غادي يستاقل وباللي الموضوع اللي تجبد ليه ضرو بزاف.

هاد الشي كولو بدا بسباب قرار القضاء لاربعا 24 ابريل فتح تحقيق فتورط مراتو بيگونيا گوميث فقضية استغلال نفوذ. المحكمة قالت باللي مراتو ارتكبات جريمة استغلال النفوذ والفساد في أعمالها الخاصة. القضية كانت رفعاتها “مانوس ليمبياس” وهي جمعية يتحكم فيها اليمين المتطرف وتعنى بمكافحة الفساد. هاد الجمعية اتهمات مرات رئيس الحكومة الصبليوني باستغلال نفوذ زوجها وتأثيرو لتوفير رعاة لبرنامج درجة الماجستير بالجامعة التي كانت تديرها”.

ول البارح السبت كانو خرجو فمدريد متعاطفين مع الحزب الاشتراكي العمالي اللي كيتزعمو٬ لدعمو والتشديد على استمرارو فخدمتو

وكانت تدوينة سانشيث لاربعا اللي فاتت قد زلزلات الصبليون كولو باش كتب “أصبح مستعجلا بالنسبة لي الجواب عن سؤال ما إذا كنت سأستمر على رأس الحكومة أو أنسحب من هذا الموقع الرمزي المشرف”.