كود سبور//

هضر أسطورة حراسة المرمى المغربي ياسين بونو على تطور كرة القدم فالسنوات الأخيرة، وخصوصا فالقارة الأوروبية، اللي بغينا ولا كرهنا كتبقى سباقة وبزاف فمستواها وقيمتها على باقي القارات.

ياسين بونو وخلال المرور ديالو فحوار مع قناة “Directvsports” هضر على تطور الكورة الأوروبية وكيفاش أن الكورة ديال اليوم تبدلت وما بقاتش كيف شحال هادي، وقال أن اللعب الجماعي صبح كياخذ مساحة أكبر من اللعب الفردي، وركز على حاجة مهمة وقال أإن كرة القدم حاليا ولات متعلقة بالمدربين أكثر من اللاعبين.

هاد الجملة الأخيرة من كلام ياسين بونو، كتخلي أي واحد يتمنعن فالكلام ديالو ويفكر ويطرح سؤال مباشر ”

واش فيها إشارة باللي بلادنا ايلى بغات تربح الألقاب خاصها مدرب كبير؟”، خصوصا وأن المنتخب الوطني المغربي عندو لاعبين بإمكانيات كبيرة بزاف وما كاين حتى شي فرق ما بينهم وبين اللاعبين اللي عندهم جنسيات أوروبية، والأكثر من هذا دايرين بلايصهم فأندية أوروبية كبيرة بحال ريال مدريد وبايرن ميونخ وليفركوزن وإشبيلية، وهنا السؤال اللي بوحدو كايجي واش عندنا مشكل فالمدرب وداكشي علاش ما عندناش الفينيسيون فالبطولات الكبيرة؟ واش خاصنا مدرب كبير وعالمي باش يعرف يوظف امكانيات هاد اللاعبين ونقدرو نربحو الألقاب ؟