كود أكادير //

أثار غياب كريم أشنگلي رئيس جهة سوس ماسّة لفعاليات افتتاح المعرض الدولي ديال الصيد البحري أليوتيس السيمانة الفايتة بزاف ديال البوليميك فالأوساط السياسية.

الافتتاح لي كان حضر فيه رئيس الحكومة ووزيرة الفلاحة وكاتبة الدولة المكلفة بالصيد البحري ووالي جهة سوس ماسة وشخصيات أخرى غاب عليه رئيس الجهة كريم أشنگلي وهو غياب مثير للاهتمام وقالت مصادر مقربة منو أنه كايعاني من وعكة صحية.

هاد الرواية ديال الوعكة الصحية مامفهوماش خصوصا وأن أشنگلي حضر قبل يوم الافتتاح ديال أليوتيس لواحد النشاط فالقنصلية الفرنسية فأكادير وكذلك بعد يوم الافتتاح أي يوم 6 فبراير شارك كريم أشنكلي رئيس مجلس جهة سوس ماسة بأكادير، ف لقاء ترأسه كريم زيدان الوزير المنتدب لدى رئيس الحكومة المكلف بالاستثمار والتقائية وتقييم السياسات العمومية، حول تنزيل استراتيجية الاستثمار الخاص ومن بعد هادشي حضر عاوتاني فحفل تسليم جوائز فمعرض أليوتيس غير هاد المرة مكانوش الناس بزاف بحال الافتتاح.

هادشي كايعني أن الرواية ديال الوعكة الصحية ماشي صحيحة خصوصا وأن مصادر كاتقول بلي كريم أشنكلي عندو خلافات مع بعض من قيادات الحزب ديالو بالتزامن مع الأخبار لي كاتروج أنه يقدر يرجع للحزب ديالو “البام” ورجحت مصادر گود كذلك أنه يقدر يكون سبب غيابو عن الافتتاح د أليوتيس أمور أخرى.

أشنگلي كايحاول مرارا يلمع صورتو بتوقيع اتفاقيات مع جرائد ووكالات إشهار ولكن كلشي داكشي فشل خصوصا وأنه كايعطي وعود أغلبيتها غير شفوي.