كود سبور//

كيواصل الكثير للجدل زفين فاندنبروك مدرب الوداد الرياضي خلق البلبلة فمحيط الفريق، وفبلاصة ما يركز مع لكروب على اللي باقي من منافسات البطولة الاحترافية وكاس العرش بعد خسارة لقب عصبة أبطال إفريقيا، نايض خارج فالإعلام المصري بلا مبرر.

وفتصريحات أقل ما توصف بها أنها هاوية وماشي فمحلها ولا فوقتها، خرج زفين فاندنبروك مدرب الوداد الرياضي مع واحد القناة مصرية، وبدأ كيتكلم على عصبة أبطال إفريقيا اللي سالات اصلا، وكيعظم فالأهلي المصري اللي خسر معه الفينال وقال أنه مولف يربح عصبة أبطال إفريقيا، وكيصغر من الوداد الرياضي وقال أن الفريق الأحمر فرحان حبت وصل للفينال.

ومن شأن الخرجة الإعلامية ديال زفين فاندنبروك أنها تسلط عليه غضب مكونات الوداد الرياضي، وخصوصا أنها جات فهذا الوقت اللي من المفروض فيه أن المدرب المذكور يكون ساد عليه وكيوجد لكروب باش يتقاتل حتى آخر لحظة على لقب البطولة الإحترافية، حيث هو من أسباب الضياع ديالو إذا خسرو الفريق الأحمر هو عصبة أبطال إفريقيا اللي ضاع بسداجة تكتيكية ديالو.