كود سبور//

كيبان أن العنصرية رجعت بقوة التيرانات الإسبانية، وهذا الشي تأكد تاني فماتش البارح بين إشبيلية وريال مدريد فبطولة إسبانيا، ومرة اخرى تشكى منها النجم البرازيلي فينيسيوس جونيور.

وخرج فينيسيوس جونيور ببلاغ قال فيه على واحد اللقطة بان فيها شي واحد من جمهور إشبيلية كيدير شي حركة وقال: “كنشكر إشبيلية على موقفهم السريع فهاد الحادث د العنصرية واللي بطلها هاد المرة كان طفل”.

وكانو إشبيلية البارح خرجو ببلاغ ملي سالا الماتش بينهم وبين ريال مدريد، علنو أنهم علمو السلطات على شي واحد من جمهمورهم عاير شي زماكري وراه شدوه، بدون ما يجبدو البرازيلي فينيسيوس جونيور.

وماشي هادي هي المرة اللولى اللي كيعاني منها فينيسيوس جونيور من العنصرية فالملاعب ديال اسبانيا، حيث فايت وقعت له فماتش ضد فالنسيا الموسم الماضي، ووقعت حتى لأجانب اخرين، وهذا الشي يقدر يؤثر فالتنافس ديال اسبانيا مع المغرب على تنظيم فينال مونديال 2030.