احمد الطيب كود الرباط//

حروب غريبة بدات مع السباق الانتخابي حول شكون يقدر ينافس بقوة على رئاسة حكومة المونديال. هاد الحروب بانت هاد الأيام فالسوشل ميديا من خلال تمويل صفحات معينة ضد رئيس الحكومة.

“النيفو طايح” فالصراع السياسي وصل لتمويل منشورات في صفحات شعبوية كاضرب ف أخنوش وتكبر بقيادات سياسية أخرى في الحكومة.

هاد الصفحات كتسيرها مجموعات أشخاص، وأسمائهم معروفة، وحسب مصادر عندها معطيات حولها، فكاينين صحفات كيقدمو خدمات بـ200 حتى لـ500 درهم للمنشور.

“كود” رصدت هاد الصفحات، واللي وصلت لـ6 كلها نشرت نفس المنشور (فيديو) كتهاجم رئيس الحكومة وكتبان فيها فاطمة الزهراء المنصوري “السوبر وزيرة” أو المنقذة لمشاكل المغرب، منها :”Fassion beladi” و”Stars beladi” و”moroccogov” وkabou-36 ولالة الكسالة.

وعاد باقي الصفحات لي معروفين بنفس الخدمات ولكن الفيديو والحملة مداروهاش هاد المرة على أخنوش :” Moroccan titiz ،Alhora ، Ch3ibya، Hama9a، Dima marrakech، Maghribiya wataftakhir”.

هاد الأسلوب الدنيئ في الحروب ضد رئيس الحكومة، كيفكرنا ف أيام المقاطعة وكيفاش الإسلاميين دارو حملة كبيرة ومنخرطين فيه جهات سياسية لخلق البلبلة والضرر بالاقتصاد الوطني.

كاينا دبا تساؤلات حول شكون الجهة السياسية لي دايرا هاد الحروب قبل سنة من موعد الانتخابات.

وحسب مختص فهادشي ديال الصفحة، هضر مع “كود”، فراه نفس الصفحات تقوم بالتسويق لجهات سياسية معينة قبل ايام قليلة من الحملة على أخنوش، ومنها مثلا جواز الشباب لي جاب المهدي بنسعيد.

وحسب مصادر “كود”، كاين تساؤلات حول الشركات التي تشتغل بأساليب دنيئة حقيرة، منها مثلا لي تكلفات بالهجوم على جريدة “كود” حيث كتبات مقالات على الوزير بنسعيد.

تفاصيل إضافية حول هذه الصفحات وكيفاش كتشتغل والشركة الكبيرة لي موراها ولي عندها ملفات وأحكام قضائية، نرجعو ليها.