الرئيسية > آراء > واش هاد الناس بغاونا نوليو ضحكة فحال مصر و السعودية لي كاتعاقب الناس لي كايعبرو على رأيهم فالاديان و كاتسد ليهم فمهم بديك التهمة ديال “ازدراء الاديان” لي الهدف ديالها الاساسي هوا محاربة حرية التعبير! مينة بوشكيوة ماقالتش شي حاجة من راسها و داكشي راه مكتوب فكتب التاريخ و السنة النبوية !
26/05/2020 19:00 آراء

واش هاد الناس بغاونا نوليو ضحكة فحال مصر و السعودية لي كاتعاقب الناس لي كايعبرو على رأيهم فالاديان و كاتسد ليهم فمهم بديك التهمة ديال “ازدراء الاديان” لي الهدف ديالها الاساسي هوا محاربة حرية التعبير! مينة بوشكيوة ماقالتش شي حاجة من راسها و داكشي راه مكتوب فكتب التاريخ و السنة النبوية !

واش هاد الناس بغاونا نوليو ضحكة فحال مصر و السعودية لي كاتعاقب الناس لي كايعبرو على رأيهم فالاديان و كاتسد ليهم فمهم بديك التهمة ديال “ازدراء الاديان” لي الهدف ديالها الاساسي هوا محاربة حرية التعبير! مينة بوشكيوة ماقالتش شي حاجة من راسها و داكشي راه مكتوب فكتب التاريخ و السنة النبوية !

سهام البارودي – كود//

جوج ديال الاحداث وقعو هاد السيمانة و لي نوضو الشياط فمواقع التواصل الاجتماعي ! التدوينة ديال الاستاذة مينة بوشكيوة على زيجات النبي محمد و الفيديو ديال رفيق بوبكر لي كايهضر فيه على الشراب كطريقة من طرق التعبد !
بالنسبة للتدوينة د مينة بوشكيوة انا شخصيا مابان ليا فيها حتى شي سب او قذف او استهزاء بالدين ! السيدة كتبات بالدارجة داكشي لي مكتوب فكتب الثرات و السيرة النبوية ! انه النبي كان كايتزوج بالعيالات بزاف و تزوج حداشر مرا راها حاجة معروفة و قريناها فحصص التربية الاسلامية و گاع الدعاة كانو كاينصحونا نحفظو سميات امهات المؤمنين و نبغيوهم فحال لي كانبغيو ماواتنا و نبكيو عليهم فاش نتفكروهم بحرقة حيت توحشناهم واخا ماعمرنا ماشفناهم ! و انه الرسول تزوج مرا كبر منو بخمساوعشرين عام خديجة راه تاهي معروفة ! و خديجة كون كانت عايشة معانا فالفين و عشرين فالداوديات فمراكش و لا فدرب الكبير فالدار البيضا و لا فبطانة فسلا كانت غاتسمى “ميمة” مصطلح كايطلقوه الدراري على العيالات فواحد السن معين (فوق الربعين) لي كايكونو زوينات و مهليات فراسهم ! و ماكانشوف حتى اساءة فهاد القضية و متأكدة انه كون كانت التدوينة بالعربية الفصحى ماكانتش غاتنوض هاد الزوبعة كاملة ! الدارجة قربات حياة الرسول و الصورة ديالو من المخيلة الشعبية ! و هادشي راه من الاسباب علاش الخوانجية كايحاربو الدارجة حيت عارفينها غاتحيد واحد الهالة ديال القداسة على التاريخ الاسلامي و غاتبينو للناس بطريقة اوضح و اكثر حياد و غايقدرو يناقشوه و ينتاقدوه! بلا ديك قوة الحشو و التزواق لي كايدار بالعربية الفصحى و لي النص كايفهموه الناس و النص ماكايقشبلو فيه والو !

حديث مثلا فحال الحديث ديال “فأعضوه بهن أبيه” لا ترجم بالدارجة راه غايقرب المتلقي اكثر من السيرة النبوية و غانشوفو فيه النبي فصورة اقرب للانسان ! و لا واقعة فحال لي وقعات للصحابة فصلح الحديبية فاش قال عروة بن مسعود لما جاء مفاوضاً عن المشركين في ” الحديبية ” للنبي صلى الله عليه وسلم : ” فَإِنِّى وَاللَّهِ لأَرَى وُجُوهًا ، وَإِنِّى لأَرَى أَوْشَابًا مِنَ النَّاسِ خَلِيقًا أَنْ يَفِرُّوا وَيَدَعُوكَ ” ، و ناض جاوبو أَبُو بَكْرٍ : ” امْصُصْ بَظْرَ اللاَّتِ ، أَنَحْنُ نَفِرُّ عَنْهُ وَنَدَعُهُ ” ، فَقَالَ : مَنْ ذَا ؟ قَالُوا : أَبُو بَكْرٍ .
رواه البخاري ( 2581 )

اذا ترجم للدارجة اكيد غايكون عندو وقع مختلف على عباد الله لي غايسمعوه !

انا كانشوف بلي بالعكس مبادرة محمودة انه تم ترجمة التاريخ الاسلامي للدارجة و حتى الاحاديث و السنة النبوية و القرآن علاش لا باش تقربها من الناس اكثر و يفهموها بشكل احسن ! القرآن اليوم كايترجم للفرنسية و الانجليزية و الشينوية ! علاش مايترجمش للدارجة و الريفية و السوسية مثلا ؟ شنو المانع من غير التعنتيت ديال الخوانجية و العقلية المتحجرة ديالهم لي باغا تحافظ على ديك الهالة بزز حيت واكلين بيها ميمي ! راه لاجيتي تشوف ماليها تا معنى بنادم يدوي بالدارجة و ياكل بالدارجة و ينيك بالدارجة و يخدم بالدارجة و يكتب بالدارجة فالواتساب و الفايسبوك و يتحاب بالدارجة و يتعاير بالدارجة و غير يوصل للدين يقلبها عربية ديال القرن جوج و ما فتئ و ما انفك و حيثما …. راه حتى الاشهارات ديال كورونا فالتلفزة و الراديو كايدارو بالدارجة و بالامازيغية ! واش تفهم كورونا اهم من انك تفهم الدين ؟ ماكانظنش ! و هاد النقاش كان حتى فالكنيسة حول اللاتينية و اللغات المتفرعة عنها و لكن حيت حنا مازال فالقرون الوسطى ديال الانسانية راه يا الله هاد النقاشات وصلونا!

و الخوانجية دابا مصرين يهيجو الجماهير و يخرجو يولولو فحال الهجالات على ” دين لم يدافعو عليه كالرجال” و يديرو دوك الفيديوات مع ديك الموسيقى ديال التأوهات ” هااااا هااااااا هااااا” باش يلعبو على العواطف و يغوتو و يدعيو الدولة باش تشد مينة بوشكيوة و تشد رفيق بوبكر و تشد عصيد و تشد اي واحد تجرأ يسطل بسطله فالدين فحالا حنا عايشين فقندهار ! بل كاينين گاع لي بداو كايبارطاجيو دعوات لقتل السيدة و اهدار دمها ! وا زيد نتا مع هاد الخوشبيش لي بلانا بيهم الله ! و كون ماكانش الحجر الصحي كون طربونا بشي مسيرة من دوك المسيرات ديال ” الا رسول الله” باش يديفولاو فيها شوية!

آ سمع آ سي الخوانجي الظلامي الاقصائي التكفيري ! المغرب ماشي هوا قندهار ! انا كمواطنة مغربية مسلمة بغيتها تكون دولة الحريات ! بغيت حرية تعبير اكثر و النقاشات تفتح لمناقشة الدين حتى هوا ! مالكم باغين تحطو هالة على الدين و تناقشوه غا بوحدكم باللغة لي كاتناسبكم واش مكتوب ليكم فالورث ؟!

و بلا مايجي يقوليا شي واحد راسو مربع علاش كاطالبو بحرية التعبير للحداثيين و ماكاطالبوش بيها للاسلاميين و السلفيين و من حذو حدوهم زعما باش يزمطني ! انا كانآمن بالمقولة الشهيرة ديال السي لويس انطوان ليون لي كايقول ” لا حرية لاعداء الحرية ”
Pas de liberté pour les ennemis de la liberté
نتا كخوانجي او سلفي او اي انسان كيف ما كان ماكاتآمنش بالحرية بالمفهوم ديالها الكوني ! و مامستاعدش تآمن بحرية العقيدة و الحرية الجنسية و حرية التعبير آ سيدي انا فنظري و فنظر العزيز لويس انطوان ماتستاهلش تكون عندك الحرية ! يا الله !
نتا كإنسان ماباغيش تحتارم الحرية بالمفهوم ديالها الكوني ! و باغي تجرم المثلية و تجرم العلاقات خارج اطار الزواج و ماكاتحتارمش حرية الآخر فأنه يفطر و لا يصوم و ماكاتحتارمش حرية المرا فأنها تلبس المايو و لا الميني ! و باغي تفصل لينا و تخيط لينا مفهوم ” الحرية” على المقاس لي كايناسبك نتا نتا نتا فنظري الغير متواضع ماتستاهلش تكون عندك ” حرية التعبير ” ! نتا خاص تحضي معاك الدولة و تراقبك عن قرب ! حيت لاطلقات ليك اللعب غانشوفوك غدا خارج كاتكفر و تدعي لاهدار دم عباد الله فحال لي كايديرو دابا الصفحات الهمجية لي سينيالات لاباج ديال السيدة مينة بوشكيوة و لي كاتدعي للسينيال د صفحة رفيق بوبكر !
لا حرية لاعداء الحرية
لا حرية لاعداء الحرية
و نعم لمناقشة الاديان !

موضوعات أخرى

11/07/2020 15:00

من بعد صورة منال بنشليخة مع راجلها بالبيكيني.. شي عيالات متخلفات طيحو علينا الذل.. قاليك الراجل هو اللي يتحكم فالمرا ويغطيها بالشراوط وخاصها تطيعو وتخدمو.. أودي دخلو سوق راسكم !! عايشين بحال العبيد وبغيتو تفرضو العبودية على العيالات الحرات صحا

11/07/2020 14:00

كيفاش الدولة المغربية كدعم شركة باطرونها اماراتي وهابي ومخلية شركتنا الوطنية . واش “لارام” غادية تتخلى على 20 طيارة وباش جات لوجيبة دور الصرف دخلات معاها الحكومة “العربية”