كود كازا//

وزارة الخارجية الإسبانية كل اسبوع تقريبا كتخرج بيان فيه نصائح للسياح الإسبان كتدير فيه تحذيرات للمناطق اللي فيها الخطر باش مايوقع ليهم حتى مشكل ويدوزو العطلة ديالهم بخير.

السبت الفايت، فالبيان ديالها، دوات على المغرب مزيان وكّالت عليه بلد “آمن”، غير شنو وصاتهم يبعدو على بعض البلايص خاصة اللي فيها منشآت عسكرية وصاتهم ما يصوروش حداها، والبلايص اللي فالخلا فالجبل لكن خاصة فالصحراء.

وصاتهم مايتساراوش بوحديهم ويحاولوا ما أمكن يبقاو مجموعين ويسافرو بزاف بيهم، وإذا خرجو برا المدينة فالصحرا يركبوا لي كاط كاط ويتحركوا في مجموعات كبيرة.

داخل المدينة وصاتهم يردوا البال من الشفارة سوا اللي كيسرقوا بالخفة أو هادوك اللي كيكّرسيوا بالموس فالزناقي والدروبا الضيقة أو في الشوارع الخالية والمظلمة.

وأغرب جوج نصائح اللي عطات سبانيا لرعاياها هي يبعدو على كتامة حقاش كّاليك الناس تما كيلصقوا فالتوريس وكيبغيوا يبيعوليهم الزطلة بزز، والثاني وصاتهم يردو البال لخطر الزلازل تكّول المغرب كيضرب فيها زلزال كلا عام !!

الحاصول سبنيول مالقاو حتى عيب فبلادنا وبغاو يخرجو شي عيب بزز عملاً بالمثل المغربي “حتى زين ماخطاتو لولا”.