كود هناء ابو علي ////

وزير الخارجية والتعاون ناصر بوريطة كيدوز باكفس ايامو. هاد الوزير المغرور اللي ديما كيركب على خدمة اجهزة اخرى٬ ما بقاش تحرك من العاصمة الرباط ومكتبو بوزارة الخارجية.

اخيرا كيدير لقاءات فمكتبو. حضورو لاستقبال الملك لسفراء اجانب على دفعتين هاد السيمانا كان بروطوكولي فقط.

دابا عليه غضبة على شي تصرف دارو. هو كيزبلها ديما. هاد التقنوقراطي ما عمرو يكون وزير خارجية كبير. ناقصاه الديبلوماسية. ناقصاه الكاريزما. كيتصرف بتهور فامور كثيرة. المغرب عندو المونديال دابا ف2030 وخاصو وزير خارجية مرزن ماشي واحد حافظ دروسو وكيعرضهم بحال پاپاغاء.

الغضبة عليه بانت فالدورة 78 للجمعية العامة التابعة للامم المتحدة نهاية الشهر اللي فات بنيويورك. شفنا ان اللي لقى كلمة المغرب ماشي وزير الخارجية فغياب رئيس الحكومة او الامير مولاي رشيد كممثل لرئيس الدولة. اللي لقى الكلمة ديال بلادنا هو عمر هلال المندوب الدائم للرباط فنيويورك.

الخدمة اللي دارها عمر هلال والطريقة اللي رد بيها على مندوب الجزائر باش جبد بلادنا٬ كتبين الفرق بين واحد ديبلوماسي قافز بحال هلال وبين بوريطة اللي عزيز عليه يسوق راسو وينسب خدمة لخراين ليه.

واش بوريطة غادي يطير فالتعديل الحكومي ديال وسط ولاية حكومة اخنوش؟ محتمل جدا. وقعو تغيرات. الديبلوماسية خاصها شي ديبلوماسي او ديبلوماسية رزينة. سالى وقت التنقاز. خاص يتسد قوس بوريطة.

راه دابا عندو مشاكل مع عدد من السفرا. تصرفاتو وحرصو يدير كلشي ويتحكم فكلشي من كتابة عامة حتى كتابة البيانات والاتصال بالصحافيين باش ينشر هاد لخبار او لاخر٬ ماشي تصرفات وزير خارجية دولة بحكم المغرب. باغي يكون بوحدو ويقول لسيدنا: انا بوحدي مضوي لبلاد. كيبان هاد الضو بدا يحرگ فيه