كود -eldebate //
دخلات فنزويلا فواحد المرحلة مضببة، بعدما تعتقل نيكولاس مادورو لي خلا البلاد واقفة على رجل وحدة، وزاد العجب ملي خرج ترامب ودار ديلسي رودريغيز، نائبة الرئيس، هي الواجهة ديال “المرحلة الانتقالية‘‘.
جريدة eldebate الإسبانية كتقول بلي المعارضة الفنزويلية تصدمات، حيت ديلسي كانت محسوبة على قلب النظام، وهادشي خلا بزاف ديال الناس يطرحو سؤال خطير: واش ديلسي خانت مادورو؟
حسب مارتين روديل، واحد الخبير فالاستخبارات وملاحقة شبكات المخدرات، ديلسي رودريغيز كانت هي أهم ورقة لعبات بها الـCIA ، كيقول باللي هي وخوها خورخي عطاو معلومات دقيقة على تحركات مادورو، فين كينعس وفين كان مخبي راسو واشنو كياكل وروتينو اليومي حتى تسهلات عملية اعتقالو بلا دم.
روديل وصف داكشي بـ “المسرحية”: ديلسي كتبان قدام الشعب بحال إلا ما زالت وفية للنظام، ولكن فالحقيقة كانت كتخدم مع مريكان باش تنقذ راسها وتخرج بأقل الخسائر. السبب حسب نفس المصدر، هو أن ديلسي حتى هي عندها ملفات تقيلة فالمحاكم الأمريكية، وكانت خاصها “مخرج مشرف” ولا منفى مريح.
ترامب بدورو عطاها إنذار واضح: إلا ما دارتش اللي مطلوب منها، غادي تخلص أكثر من مادورو. اليوم، ديلسي واقفة فموقف صعيب: النظام ديالها شاك فيها، والمعارضة ما كتيقش فيها، والشعب كيتسنا يشوف شكون غادي يخلص الثمن فالأخير.
موضوعات أخرى
شكون لي زرگ لماكرون عينو.. واش مرتو ولا غير العيا؟ (فيديو)
ترامب فرحان بميدالية نوبل للسلام لي عطاتو زعيمة المعارضة الفنزويلية ماريا ماتشادو
مادورو وجه رسالة من حبس فمريكان للشعب الفنزويلي.. ها شنو جا فيها
