كود – سبور //

فماتش المنتخب الجزائري ضد منتخب غينيا الاستوائية للي تلعب فالملعب ديال “مولاي الحسن” لبارح الأربعاء، ومني صفر الحكم، وقعات واحد الواقعة اللي خلات المسؤولين ديال تنظيم كأس أمم إفريقيا بالمغرب 2025 يتحركو دغيا، وهي الواقعة لي كان موقع “برلمان كوم” سباق لنشر الفيديو لي كي وثقها.

المسؤولين تفاجؤو بغياب جوج د الكواري من أصل 15 كرة اللي كانت مخصصة للماتش، الكاميرات صورات أعضاء الطاقم التقني ديال المنتخب الجزائري خذاو وحدة من الكورات  بين الأشواط اللقطة بينات مني خشاو الكرة تحت الحوايج وداوها معهم، أما الكرة الثانية مازال معرفوش فين غبروها .

منسقة الكاف مشات ديريكت للڤيستيير ديال المنتخب الجزائري باش تسول، الطاقم الجزائري، فالأول حاولو ينكرو أي علاقة بالموضوع، ولكن المسؤولة أكدات على الفيديو لي كيوثق الواقعة ولي حطهم فموقف صعيب، وهاد الشي خلاهم يرجعو الكرة اللي خذاو مباشرة للمنظمين.

هاد الواقعة لي توصفات بـ “غير الاحترافية” طرحت تساؤلات على سلوك طاقم المنتخب الجزائري فتضاهرة كبيرة بحال “الكان”.