علي الصافي – كود الداخلة ////

اختمتت في الداخلة فعاليات النسخة 13 ديال مهرجان السينما فالداخلة واللي كان فالفترة مابين 13 حتى 20 يونيو بالتشيار الجوائز ولغميق على بنادم بالإحتفال بمخرج فرنسي فإطار الركوب على الموجة وإستغلال الموقف الفرنسي الجديد اللي كدعم فيه باريس مغربية الصحرا، وبدعوات موجهة لشي نكرات جايين من دول جنوب الصحرا والخليج.

هاد المهرجان على مدى 13 سنة وهو كيدار من فلوس المغاربة وجيوبهم بلا ما يعطينا حتى إضافة ولا يحقق لينا أي مكتسب للسينما المغربية ولا حتى يكون عندو وزن عند المغاربة ولا حتى المهنيين ديال السينما. وهادشي تتحمل مسؤوليته وزارة الشباب والثقافة والتواصل والمركز السينمائي المغربي الي مشاركين فيه وعارفين حقيقتو وشكون المستفيد منو.

مهرجان الداخلة السينمائي كتحس بيه نفس الوجوه ونفس الأشخاص ونفس الفلكلور ونفس الخطاب ونفس التوجه ديال كور وعطي لعور حتى أصبح بحال الگريمة اللي كتعطى لشخص معين أو مكافأة ليه على آش ؟ ما عرفناش علاش.

مهرجان كتصرف عليه ملايين الدراهم بلا قيمة وبلا وزن وفشل طيلة 13 نسخة فأنه يدير بلاصة للمغرب إقليميا او عربيا من خلال تحولو إلى مهرجان ديال السياحة كيجيو ليه السينمائيين السياح يضربو دويرة فالداخلة ويتخلصو عليهم لوطيلات ويتم تكريمهم ويتخلصو مزيان ويمشيو بحال إلى حنا الفلوس شايطة علينا والداخلة ما خصها خير وبحال إلى كانت مدينة الداخلة بموقعها الإستراتيجي مجرد مدينة للسياحة مدفوعة التكاليف.

الأكثر من ذلك كيفاش ناس الداخلة والمنتخبين ديالها كيسمحو بهاد العبث ؟ كيفاش واحد جاي من طانطان ساكن العيون يجي ويدير مهرجان من فلوس لمغاربة بلا ما يكون هاد المهرجان عندو أي تأثير ولا إضافة. خاص وضع حد لهاد العبث وهاد الضحك على الساكنة اللي ما فراسها والو وما عارفة تا آشنو واقع واش مهرجان ولا حفلة ولا سياح. مهرجان ما عندوش إشعاع كيحاولو شي وحدين يفرضوه وعطاوه لواحد ما عندو علاقة بالمنطقة ولا بناسها.

الداخلة تستاهل ماحسن والدولة بمقدورها انها دير شي حاجة مزيانة أو مهرجانات أحسن بعيد على هاد المهرجان اللي أصبح بحال الگريمة باش واحد يدير لاباس كل عام. حنا ما عندناش تركي آل الشيخ ولا فلوس السعودية ومحتاجين مهرجان يخدم صورة المغرب ويكرس وحدته الترابية ماشي يكون مكافأة لشخص ولا لأشخاص سالاو مسيرتهم الفنية وعايشين دابا التقاعد مع وقف التنفيد.