كود الرباط//
وزير الصناعة والتجارة رياض مزور مفقوص من تقرير المندوبية السامية للتخطيط لي فضحات ضعف السياسات الصناعية بالمغرب وغياب منظومة صناعية قوية، مما تسبب في فقدان الآلاف من مناصب الشغل.
الوزير مزور، البارح، في لجنة القطاعات الإنتاجية بمجلس النواب بقا ليه غير اتهم مندوبية التخطيط بخدمة أجندة خارجية، حيث فالهضرة ديالو ربط هادشي بالحرب لي كاينا على المغرب من طرف خصومه، خصوصا فرنسا.
وقال مزور: بلي إلى خرجات المؤسسة شي مؤشر سلبي يمكن يخلي المستثمر يبدل الوجهة ديالو وما يجيش عندك”.
وذكر وزير الصناعة بسحب شركة بيجو لاستثماراتها من المغرب بضغط من فرنسا، وكذلك بالحروب لي داير البرلمان الأوروبي ضد المغرب.
مزور اعترف بلي صناعة الألبسة التركية قوية فالمغرب وأن المغاربة كيلبسو بزاف اللباس التركي، والمغرب كيستورد 2 مليار درهم من الألبسة التركية.
دبا جوج مؤسسات كيضاربو، شكون خاص يثيق فيه المستثمر والمواطن، واش الحكومة ولا مندوبية التخطيط لي عندها أطر كادير تقييم للسياسات العمومية؟.
