كود -وكالات //

فـ 2009 فطاليان، واحد الراجل تقتل حيث ضحك على  سيد اخر  فالشارع ، المحامي ديالو حاول يخفف الحكم وقال للمحكمة باللي موكلو عندو واحد الطفرة الجينية معروفة  بـ”جين المحارب”، اللي بعض الدراسات ربطاتها بالسلوك العدواني، المحكمة نقصات ليه العقوبة بعام كامل.

هاد الفكرة خلات بزاف ديال الناس يعتقدو أن الجينات هي اللي كتحدد السلوك ديال الإنسان ولكن مع تطور علم الوراثة، ولى وضح أن الأمور معقدة كتر من هكا ، الباحثين  كيأكدّو أن الشخصية ما كتتحكمش فيها جينات قليلة وقوية، وإنما آلاف التغيرات الجينية الصغيرة اللي كيتجمع تأثيرها كامل باش يساهم فبناء شخصية الإنسان.

العلماء كيهضرو على خمسة عناصر رئيسية كتكوّن الشخصية ،الانفتاح على تجارب الجديدة، الضمير والمسؤولية، الانبساطية، التوافق مع الآخرين، والعصابية أو الحساسية النفسية ،دراسات اللي دارت على التوائم بينات أن الجينات كتفسر تقريباً ما بين 40 و50 فالمية من الاختلافات بين الناس فهاد الصفات، اما النص الآخر كيرجع للبيئة والتجارب الحياتية.

ولكن حتى البيئة ماشي بالبساطة اللي كيتخيلوها الناس.، حيث، الزواج، الإنجاب، أو حتى بعض الأحداث الكبيرة ما كيقلبوش الشخصية ديما و الباحثين لقاو أن حتى الصدمات القوية اللي كيتعرض ليها الإنسان فالكبر ما كتبدلش شخصيتو كليا كما كتصور الثقافة الشعبية.

من جهة أخرى، كاين اهتمام  بتأثير المرحلة اللي كيكون فيها الجنين فكرش مو، بعض الدراسات لقات أن التوتر اللي كتعاني منو الأم فيام الحمل يقدر يأثر على لمزاج ديال الدري من بعد الولادة، ولكن حتى هاد التأثيرات كتبقى جزء صغير من صورة كبيرة ومعقدة.

العلماء دابا كيهضرو على أن الشخصية “متعددة الجينات ومتعددة البيئات”. بمعنى أن آلاف العوامل الوراثية كتتفاعل مع آلاف التجارب اليومية اللي كيدوز منها الإنسان، كل تجربة كتخلي أثر صغير، ومع الوقت كتتراكم هاد الآثار باش تساهم فتشكيل الشخصية.

الأبحاث اللي كتشمل مئات الآلاف من المشاركين بدات كتكتاشف جينات مرتبطة ببعض الصفات النفسية. بحال،  جين كيتعلق بطريقة استجابة الجسم للتوتر، وللي قاو عندو علاقة بسمة العصابية والقلق. كما كتشير دراسات أخرى بلي مناطق معينة فالدماغ، خصوصاً الفص الجبهي المسؤول على التخطيط واتخاذ القرار، عندها دور مهم فتكوين الشخصية.

الرسالة اللي كيجمع عليها العلماء هي أن الإنسان ماشي أسير الجينات ديالو ،حتى إلا كان عندو استعداد وراثي معين، هاد الشي ما كيعنيش بالضرورة أنه غادي يتصرف بنفس الطريقة طول حياتو، الشخصية كتقدر تتطور وتتغير، والإنسان كيبقى أكثر تعقيداً ومرونة ملي  كنظنو.