الرئيسية > آراء > واش مكيحسوش المسؤولين ديال فاس وحتى مواطنيها لي صوتوا بالعار فاش كيشوفوا أطفال وشباب المدينة كيعوموا في الويدان وبوخرارو والضايات والكلاتي دالما ومكاين حتى مسبح واحد ديال البلدية بثمن مناسب حال الأبواب ديالو لسكان هاد المدينة المنكوبة بالحرارة وبسوء التسيير
11/06/2022 15:00 آراء

واش مكيحسوش المسؤولين ديال فاس وحتى مواطنيها لي صوتوا بالعار فاش كيشوفوا أطفال وشباب المدينة كيعوموا في الويدان وبوخرارو والضايات والكلاتي دالما ومكاين حتى مسبح واحد ديال البلدية بثمن مناسب حال الأبواب ديالو لسكان هاد المدينة المنكوبة بالحرارة وبسوء التسيير

واش مكيحسوش المسؤولين ديال فاس وحتى مواطنيها لي صوتوا بالعار فاش كيشوفوا أطفال وشباب المدينة كيعوموا في الويدان وبوخرارو والضايات والكلاتي دالما ومكاين حتى مسبح واحد ديال البلدية بثمن مناسب حال الأبواب ديالو لسكان هاد المدينة المنكوبة بالحرارة وبسوء التسيير

محمد سقراط-كود///

واش مكيحسوش المسؤولين ديال فاس وحتى مواطنيها لي صوتوا بالعار فاش كيشوفوا أطفال وشباب المدينة كيعوموا في الويدان وبوخرارو والضايات والكلاتي دالما ومكاين حتى مسبح واحد ديال البلدية بثمن مناسب حال الأبواب ديالو لسكان هاد المدينة المنكوبة بالحرارة وبسوء التسيير والشفارة والنصابة والفاسدين على مدى سنوات وهوما كيتوزو فيها ولا من ناهي أو منتهي، في طريق لوطوروط قبل ماتوصل للخرجة لي كتدي لبنسودة كاين واحد القنطرة صغيرة غير ملحوظة كيتجمع تحتها لما خانز عامر زبل ومع ذلك كتلقى البراهش كيعوموا فيه كذلك في عين الشقف أي بلاصة مجمع فيها لما راه كتولي بحر بالنسبة لساكنة فاس، ما موسخ مغيس غاسلين فيه الخضرة مخوض كيظلوا يعوموا بيه وليدات هاد المدينة، أي عين واخا يكون دايزة فيها غير شعبة ديال لما غادي تلقى عرام ديال الناس مجوقين عليها في مشهد بئيس ومؤلم، بينما خوتهم في الرباط كيحيرو بين الشواطئ النقية المجهزة الحاصلة على اللواء الأزرق وبين أكبر مسبح في أفريقيا وبثمن جد مناسب فايت مناسب لهيه كاع.

أكادير طنجة الشمال عموما مدن جاو على البحر ومع ذلك كاين بزاف ديال الإقامات السكنية فيهم مسبح على حقو وطريقو وخدام في الصيف ديما، مراكش حتى هي كثار الإقامات والتجمعات السكنية لي فيهم مسبح، كتجي لفاس كتلقى غير الحيوط وباب العمارة نادرا فين تشوف أو غير تسمع بوجود إقامة بالمسبح ديالها وماشي كاع حتى لوكس بحال لي كاين في المدن لخرى، هنا شجرة وحدة وبزز باش تلقاها وسط شي اقامة هادشي الى ماتجمعوش السكان وقطعهوها بدعوى كتجيب الناموس في الصيف، الإقامة لي كتلقاها مجهزة بشي مرفق زايد كتلقى فيها جامع صغير، مدينة هادي ولا مقبرة بنادم كيفكر غير في الهروب منها ولي فات فيهم الفوت كيفكوا غير لفوق في السما الأرض قطعوا معاها العلاقة.

مسابح بلدية ماشي غير مسبح بلدي واحد راه حالة مستعجلة وماشي ترف في تاني أكبر مدينة في المغرب مافيهاش حتى ضاية نقية فين يعوم الواحد ومن أكثر المدن حرارة، مايمكنش يستامر إهمال هاد المدينة الى مالانهاية، ولاد فاش المدينة العريقة العاصمة العلمية وشلا أسماء تمجيدية الى بغاى يعوم في مسبح بثمن إقتصادي خاصو يطلع لموزار أو صفرو أو مكناس خاصو يهاجر ويسافر على ود مسبح بينما المنطقي هو فاس تكون عامرة مسابح تخلق الراواج وتكون متنفس لهاد المدينة لي ولات عبارة على مدينة قديمة منسية الناس غمالو فيها ومدينة جديدة عبارة على ياجور وسيما وإر بلوس دو مستفة من الطرف لطرف بلا جرادي بلا منتزهات بلا متنفسات بلا تاحاجة السيما والبريك وصحاب الطاكوس، عيب هادشي .

موضوعات أخرى

29/06/2022 16:20

تطورات قضية التهريب الدولي للمخدرات اللي تورطو فيها جدارمية ومخازنية.. جنايات فاس رفضات تعطي السراح لواحد من المتهمين

29/06/2022 16:00

التراكتور بجوج وجوه. البام اللي دار كلشي باش يدخل للحكومة ويتنقد من الانقراض داير معارضة لوزراء لحمامة. كلفو لمهاجري مول فضيحة طنجة: وزراءنا خدامين بما يرضي الله وديال الاحرار دايرين الفساد فالصفقات

29/06/2022 14:00

جنايات مراكش نقصات الحبس للنايب السابق للعمدة اللي مشدود بتهمة النصب على فنانة شعبية.. خلاو ليه 8 شهور من بعدما تحكم ابتدائيا بعام ونص