كود -وكالات//

كاين شلا هضرة وحديث على الحالة الصحية ديال المرشد الإيراني الجديد مجتبى خامنئي مورا شهر على الضربة الجوية المشتركة بين ماريكان وإسرائيل مني ضربو مقر إقامة باه فطهران.

حسب صحيفة إسرائيلية الحالة ديال مجتبى خطيرة بزاف، وهو مازال فالإنعاش فبلاصة سرية تحت الأرض، من بعد دقات خايبة تعرض ليها فالهجوم اللي وقع فـ28 فبراير.

التقرير كيقول بلي خامنئي كيعاني من شلل فواحد الذراع وعلى الأقل رجل وحدة، بسبب فشل العمليات الجراحية، وزيد عليها إصابات خطيرة فالنخاع الشوكي والدماغ، وحتى الفك ديالو تضرر، وهاد الشي كامل كيخليه ما قادرش يدير المهام ديالو بشكل عادي.

فالمقابل وكالة رويترز نقلات على مسؤول إسرائيلي كبير  بلي الإصابات ديالو ممكن تكون خفيفة، وأن الغياب ديالو غير بسباب الحرب .

من وسط إيران السلطات حاولات تنفي هاد الأخبار، مني  أكدات بلي المرشد “بخير”، ولكن التلفزة الرسمية زادت غمّضات الصورة أكثر منين وصفاتو بـ”مجروح حرب رمضان“.

هاد التناقض كامل خلا بزاف ديال التساؤلات على شكون فعلياً كيسير الأمور فإيران،مع العملية العسكرية اللي تسمّات “الغضب الملحمي”.