كود – كازا ///

خرج البلوگر التونسي، خليل قنطارة، بتدوينة  على صفحته الخاصة بموقع التواصل الاجتماعي فيسبوك، اتهم فيها جهات مغربية باستنساخ مشروع الطوموبيل التونسية “Wallyscar Iris” وتقديمه تسويقيا كمشروع تصنيع وإنتاج أول طوموبيل مغربية 100 ف المية.

هاد المدون التونسي اللي أرفق التدوينة ديالو بصور الطوموبيل التونسية وغلاف مجلة تيل كيل وعليه صورة الطوموبيل المغربية اللي من بين المستثمرين الرئيسيين فيها شركة للسيارات “نيو موتورز”، التابعة لرجل الاعمال نسيم بلخياط، العضو في اللجنة الجهوية للاتحاد العام لمقاولات المغرب، والمساهم بحصة 50 في المائة من خلال شركته “Cap Invest”.

وتقاطرت العديد من التعليقات ديال التوانسة على تدوينة المدون قنطارة ، ومن بينها تعليق حط فيه مولاه النقاط على الحروف على هاد القضية، موضحا أن “Wallyscar Iris” أصلا ماشي صناعة تونسية 100 ف المية، الموطور ديالها من بيجو، وقطع داخلية كتشرا من شركات أجنبية داخل تونس، وحتا الشاصي يمكن ديال شركة إيرانية مبتدئة.

المعلق احمد عباس رجع لقضية اتهام المغاربة بسرقة ديزاين ديال الطوموبيل التونسية، موضحا أن صحاب الفكرة اصلا قالو النهار اللول إن تصميمها مستوحى من “jeep wrangler” الصغيرة، مستغربا كيفاش يتم اتهام شي حد بسرقة موديل طوموبيل فيه تغييرات طفيفة وصحاب “واليس كار التوانسة أصلا سارقين الموديل.