گود سبور//

واش ولات مساءلة الجامعة الملكية المغربية لكرة القدم للطاقم التقني بقيادة وليد الركراكي والطاقم الطبي اللي خدام معه ضرورة، بعد الإصابات اللي عرفتها عناصر المنتخب خلال تواجدها معه فكاس افريقيا “المغرب2025”.

نهضة بركان فريق الحارس الثاني المنتخب الوطني المغربي منير المحمدي، خرج اليوم الجمعة وأعلن ان الگول رجع عندهم بالإصابة، وانه توعت خلال حصة تدريبية مع ليكيب ناسيونال قبل من 48 ساعة على النهائي بين المغرب والسنغال، وان عندو خلع فالكتف ديالو.

الغريب هو أن منير المحمدي وحسب ما عاينو جورنال “گود”، كان حاضر فالحصة التدريبية الأخيرة د المنتخب الوطني المغربي قبل 24 ساعة من النهائي، وكان كايتدرب مع الحارسين الاول ياسين بونو والحارس الثالث مهدي الحرار، ومن الفوق راه كان المحمدي هو الحارس الثاني فاللائحة د الماتش اللي دخل بها الركراكي النهائي.

هذا الشي غريب بزاف، حيث اول حاجة هي سلامة اللاعبين والصحة ديالهم، ومن وراها مصلحة الفريق، حيث علاش غادي يعرض الركراكي سلامة گول للخطر إلى كان موعت ويديرو كحارس ثاني، وهو عندو حارس ثالث واجد وجاهر باش يلعب اللي هو مهدي الحرار، وشنو الفائدة من استدعاء الحرار إلى كان المحمدي موعت وما غادي ياخد بلاصتو.

وهذا الشي كايدير جدل كبير على اختيارات الركراكي فكاس افريقيا هو والطاقم التقني والطبي اللي خدام معه فليكيب ناسيونال، حيث الهلال السعودي حتى هما علنو ان ياسين بونو الحارس المغربي الاول رجع موعت عندهم من المشاركة ديالو مع ليكيب ناسيونال فكاس افريقيا، وحمزة إيگمان قالو ليل الفرنسي انه تقطعو ليه ليگامون ديال الركبة ليمنيا، مع العلم انه كان احتياطي ودخل كبديل فالنهائي وخرج وبقى المنتخب لاعب غير بـ10 لاعبين، وبالإضافة لإلياس بنصغير اللي كانت عندو إصابة وما لعبش، وبلاما نهضرو على رومان سايس اللي تقريبا عامين وهو غايب على المنتخب المغربي بسبب تراجع مستواه والإصابة، وملي رجعو الركراكي دخلو مع ماتش افتتاح كاس افريقيا ضد جزر القمر وتوعت فالدقايق الاولى من المباراة ومن تماك ما بقاش لعب كوب دافريك، اما عز الدين أوناحي توعت فالتداريب قبل ماتش تنزانيا وحتى هو ما بقاش لعب.