كود ـ وكالات//

مع شد ليا نقطع لك لي كانت مؤخراً بين باريس وواشنطن، خرجات فبداية أبريل 2026 هضرة كتقول بلّي الرئيس الفرنسي إيمانويل ماكرون “انتقم” من ترامب ونشر تصويرة كاتبان فيها ميلانيا ترامب مع جيفري إبستين، التصويرة دارت البوز وطلعات تراند.

منين جات هاد التصويرة؟

فالأصل، التصويرة تنشرات نهار 5 فبراير 2026 من طرف واحد الحساب ديال ضحك ففيسبوك سميتو”PaulleyTicks”، ومن بعد ما تشهرات الصورة  دار مولاها تنبيه بلّي التصويرة “مخدومة”، وزاد حتى اعترف بلّي هو اللي صنعها.

شنو الأصل ديالها الحقيقي؟

التصويرة اللي دايرة فالسوشيال ميديا نسخة معدّلة من تصويرة أصلية خرجات مع ملفات إبستين اللي نشرتهم وزارة العدل الأمريكية فـ30 يناير 2026، فالصورة الأصلية وجه المرأة كان مخبي بلون كحل قبل ما يتبدل بوجه ميلانيا.

وماكرون واش عندو علاقة؟

من بعد ما تدار بحث فالحسابات الرسمية ديال ماكرون فـX  وإنستغرام، ما تلقى حتى شي أثر لهاد المنشور. وحتى وسائل الإعلام الموثوقة ما قالت حتى كلمة على هاد القصة.

كيفاش تشهرات القصة؟

البداية كانت مع صحافي نشر التصويرة ففيسبوك وكتب “ماكرون كينتقم لكرامتو”، وهاد الشي جا بعد الطنز اللي دارو ترامب على ماكرون ومراتو، ومن تما القصة بدات كتنتاشر بزربة فالعالم وحتى وصلات شي منشورات لكثر من 6 ملايين مشاهدة فـX.

رد ديال ميلانيا

نهار 9 أبريل 2026، خرجات ميلانيا بتصريح وقالت بلّي كاينين تصاور كذوب مصورة فيهم هي وإبستين منشورين، وطلبات من الناس يتأكدو قبل ما يصدقوها، المتابعين قالو بلي مكانتش ميلانيا تخرج دير خطاب فعز الحرب ديال مريكان مع إيران كون ما قلقوها التصاور المخدومة والإشاعات المنتشرة، وحتى ترامب قال إنه مكانش فراسو هاد الخطاب لي دارت مرتو حتى شافها كتهضر.