كود -وكالات//

فدراسة علمية كبيرة دارتها جامعة أوتاغو وتْنشرات فمجلة Nature، الباحثين لقّاو بأن بزاف ديال الحيوانات الفقارية وحتى البشر، كيعيشو مدة طول إلا ما كانش عندهم تكاثر (بحال التعقيم أو التغييرات الهرمونية)، بنسبة كتراوح بين 10% و20%، السبب الرئيسي هو أن الإنجاب كيتطلب طاقة كبيرة من الجسم، سواء فالحمل او الرضاعة أو تربية دراري، وهاد الشي كيأثر على الصحة مع الوقت، بمعنى آخر الجسم كيقسم الموارد ديالو بين الصحة والتكاثر، وإذا نقصو لولاد كيبقى عند الجسم مجهود كثر باش يحافظ على راسو.

الدراسة نفسها اعتمدات على جوج مصادر كبار ديال المعطيات: الأولى كتهم كثر من 117 نوع ديال الحيوانات فحدائق الحيوانات وفأحواض ديال الحوت، والثانية كتجمع نتائج 71 دراسة علمية على 22 نوع من الفقاريات من بينها الإنسان.

ووضح الباحث الرئيسي مايك غارات بأن طول العمر عند العيالات كيرتبط بنقص التكاليف ديال الحمل والرضاعة، أما عند الذكور، التأثير كيبان أكثر ملي كينقصو الهرمونات الجنسية بحال التيستوستيرون، النتائج كتعطي دليل قوي على أن العلاقة بين التكاثر وطول العمر ماشي صدفة، ولكن عندها أساس بيولوجي واضح.