كود الرباط//

أخطر نوع فالمغرب كينشر الأفكار السامة فمواقع التواصل الاجتماعي، هوما الكسلاء اللي بغاو كولشي يبقا كيفما هو ومكرهوش يرجعو بالمغرب لسنوات العبودية وتلبس المرا الخمار وايامات الجوع والنفاق والتدين المتشدد، اييه هاد النوع ناض هاد الأيام كينشر فيديوهات كتدعو باش تبقا المرا دير دور واحد هو تبقا فدارها ماتخدم ماتخرج ماتسافر.

فيديوهات كضرب فكلام سيدنا لي كبر بالمرا وعطاها الحقوق وكان عندو دور كبير فمدونة الأسرة.. هاد الفيديوهات كيروجوها بزاف منهم شي واحد سميتو إلياس الخرسي، واحد كان تالف فالحركة الإسلامية وكان كيدير راب إسلامي (غير هاد الكلمة ديال الراب إسلامي كتعيف.. مكاينش راب ملتزم ولاخر غير ملتزم.. راب كولو تخسار الهضرة خروج عن المألوف هو تعبير عن حاجات كنحشمو نقولوها قدام العامة ولكن كنقولوها بيناتنا..).

البشاعة ديال هاد الفيديوهات هي أنها محاولة بئيسة للضغط على الدولة (زعما راه الشارع متدين وصحاب تكتكوك كيحذرو من أي توجه حداثي فالقوانين لي جايا)، علما أن هاد المتخلفين كيهضرو من منصات فيها الحرية المطلقة لي بغا يقول شي حاجة يقولها واللي بغا يصور راسو كيشطح كيصور وللي بغا يهضر فالجنس كيهضر.. هاد المتخلفين كيجيو لمنصات فيها حريات مطلقة باش يطالبو مطالب ضد حرية المرأة.

أولا سواء القانون الجنائي الحالي أو القوانين الأخرى أو مدونة الأسرة، راه متجاوزة بقوة الواقع، ايييه ما نسميه بالحريات الفردية وكتوصفوه نتوما بالزنا راه واقع وكولشي كيديرو وناس مرتاحة من ناحية الدولة ميكة عليهم. وزيد عليهم كاع القوانين للي كتفرض ضد حرية المرأة متجاوزة لأن المرا فالمغرب تفوقات وصلات مناصب كبيرة شرفات صورة بلادنا فالرياضة فالفن فالعلم فالثقافة وفالسياسة، كذلك عندنا ثلاثة نساء شادين منصب عمدة المدينة (مراكش، كازا، الرباط).

هادو لقاو حرية فوسائل التواصل الاجتماعي باش يقولو خاص المرا ترجع للدار تجلس تبقا مقابلة ولادها لأن مهمتها هي تربية الأجيال، عرفتو شكون كيجيبو يقول هاد الكلام.. كيجيبو واحد السيدة دايرا نقاب بلدي (لللي كيدار زمان هادي) باش تقول أنا مرا وباغيا نجلس فالدار وراجلي يصرف عليا. اييه يا المكلخة راه مكاينش شي مرا، من غير يلا كانت متخلفة ومخداماش ومعندهاش لي يصرف عليها، تقبل تجلس فالدار.

لعيالات كيخرجو يتفرجو فالتيران فماتش الرجال، كيتقهاواو كيمشيو للبار وهادشي لا ينقص من قيمتهن ولا ممكن نشككو فالأخلاق ديالهم.. بزاف منهم خدامات مرتاحات ناشطات ومنهم متزوجات ومربيات وليدات زوينين قارين وعادي.

هاد النوع اللي باغي يرجعنا لور، غانواجهوكم وغاندافعو على التوجه الحداثي للدولة ولوزير العدل الحالي واللي بغا يعطي كثر حقوق لفئات هشة وباغي يجرم تزويج القاصر (حتى هادي معجبتكمش ..) ياك ما مكتشجعو اغتصاب الطفلات ومبغيتوش تصرحو بها نيشان. خليتو البنات يقراو ويوصلو راه بهم ممكن المغرب يدير ثروات فمجالات كثيرة.