كود الرباط//

بعدما دارت بيانات كتقول فيها إنها كتحترم المؤسسة الملكية وغادي توقف الاحتجاجات شي ايام، رجعت حركة “جيل زيد 212” فخطاب متناقض على صفحتها الرسمية ف ديسكورد، وبدات كتروج لنداءات باش تنظم “وقفة مليونية” فنهار الخميس، ومدارتش حتى خطوة تجاه الخطاب الملكي للي غايكون نهار الجمعة بمناسبة افتتاح السنة التشريعية فالبرلمان.

أحد منشورات المسيرين والمتحكمين عن بعد ف الكروب على “ديسكورد” ديالهم كتب بوضوح: “وقفة مليونية بإذن الله غداً على الساعة 6”، مع إشارات تحريضية بحال “ديرو خدمتكم”، في الوقت اللي الواقع فيه كيبين أن اللي كينزلو للشارع ما كيتعداوش العشرات، محسوبين على رؤوس الأصابع، وكيعاودو الظهور نفسهم كل مرة.

لكن الأخطر هو الاستعمال المريب لمصطلح “مليونية”، وهو مصطلح معروف فالقاموس الإخواني، واستُعمل تاريخياً فـ*المسيرات المليونية” ديال الإسلاميين للضغط على القصر**، بحال المسيرة الشهيرة اللي كانت ضد مدونة الأسرة وكذا مسيرات التضامن مع فلسطين والاعتصامات الليلية لي دارو الاخوان ف مصر، واللي كانت فيها شعارات وتعبئة منظمة من طرف التيار الإسلامي.

هاد التماثل اللغوي والسياسي ماشي بريء، خصوصاً وأن دعوات جيل زيد الحالية كتجي فوقت حساس، ساعات قبل الخطاب الملكي، ومع عودة صفحة “جبروت” اللي نشرت قبل ساعات تهديدات وتحريضات خطيرة ضد الدولة.

وبالرغم من البلاغات اللي كتنسب لحسابات غير رسمية كتقول أن الحركة غادي توقف الوقفات، فالقناة الرسمية ديال “GENZ212” ما لغاتش رسمياً لا وقفة الخميس لا وقفة الجمعة، بل بالعكس، كتستمر فالتعبئة الرقمية تحت هاشتاغات #اخنوش_ارحل و#genz212 و#freekoulchi، وهادشي كيبين بلي كاين التسييس والتآمر ضد مصالح البلاد مع اقتراب موعد الكان وانتظار قرار اممي لصالح الوطن ف قضية الصحراء، وحتى الوضعيّة الاقتصادية للمغرب جيدة وممتازة سواء من حيث تخفيض العجز والتحكم ف التضخم وتوقع ف زيادة النمو، ناهيك عن التقارير الدولية التي تشيد بالاستقرار الاقتصادي والمؤسساتي والمالي للدولة المغربية.