گود سبور//

كيبان أن الاتحاد الإفريقي لكرة القدم، ما غيدوزهاش للحكم المغربي رضوان جيد حيث انتفض عليه، وما بغاش يحكم ماتش ترتيب كوب دافريك ’’الكوت ديفوار 2023″، حيث كيشوف أنه أحق باش يلعب ماتش الفينال.

وقرر الاتحاد الإفريقي لكرة القدم، يحيد الحكم الدولي المغربي رضوان جيد من ماتش قمة الجولة الخامسة فگروبات شومبيونزليك، بين الترجي ونجم الساحل التونسيين، بعدما تعين فوقت سابق باش يلعب هاد المباراة المهم واللي عندو متابعة كبيرة على المستوى الأفريقي والعربي.

الكاف ما وقفش عند هاد الحد، ولكن حط فبلاصتو المغربي الاخر سمير الگزاز، باش يحكم الماتش بين الترجي ونجم الساحل فموقف كيخلي المتتبعين يطرحو أسئلة كثيرة، واش باغيين يحرجو الحكمين بجوج أو يحرجو المسؤولين على التحكيم المغربي باش ميدافعوش على جيد، مع العلم أن جيد كمل كوب دافريك فلوائح الحكام، وتعين فماتش الترتيب وسمير الگزاز بعدوه هو عدد من الحكام بعد ثمن النهائي بسبب ضعف المستوى.