كود بوزنيقة//

قالت فاطمة الزهراء المنصوري، منسقة القيادة الجماعية لحزب الأصالة والمعاصرة، في أول حديث لها عن علاقتها بالسلطات العليا وللي كيتروج عليها بخصوص علاقتها بالفوق وبلي كتهضر باسم الفوق، (قالت) “يلا قصدو بالفوق سيدي ربي أنا مسلمة كنتبنا هاد الفوق”.

وأضافت المنصوي، اليوم في لقاء الجامعة الصيفية لحزب الأصالة والمعاصرة بمدينة بوزنيقة: “أنا كنأمن بالله ومربية ولادي بدين الإسلام وبنت الصالحين”.

وقالت المنصوري “يلا كايقصدو الفوق بالملك كنتبنا الخطابات ديالو والرسائل ديالو ودستوريا يوجهنا وكنفتخر بها. يلا كانو كيقصدو شي فوق آخر يقولوه لينا بلا ما يتخباو “.

وتابعت المنصوري: “فينما كانت شي مرا ديما خص يلقاو ليها شي واحد يسيرها بالتلكوموند زعما خلقنا سيدي ربي بلا عقل. لا يتبنى الاخرى سوى ضعيف الشخصية. ونتوما كتعرفوني مواقفي كندافع عليها. ما عمرني مغادي نخون ثقة المواطنين والملك. ولي بغا يهضر يهضر”.

وقالت المنصوري بلي “العلاقة مع وزارة الداخلية ديما واضحين مرة خوت مرة عديان، مرة مخاصمين مرة متفقين.

وتابعت: “وكون كان شي جهة كتحكم فالحزب كون بقا أمين عام منذ التأسيس”.