كود سبور//

فالوقت اللي كلشي كايتنسا من الناخب الوطني وليد الركراكي يقوي الخطوط ديال المنتخب الوطني المغربي، استعدادا لكاس أفريقيا “المغرب 2025″، ويستغل ماتش الأسود ضد منتخب ليسوتو المتواضع برسم الجولة الثانية من الاقصائيات، لإدماج اللاعبين الجداد سوا اللي طالعين من منتخب اقل من 23 عام او اللي كايعيط لهم لاول مرة، وإدماجهم بشويا بشويا مع توالي المباريات، ولكن هو ناض بدل 90% من التشكيلة الرسمية، ولعب اللاعبين الاحتياطيين مع الإبقاء فقط على اشرف حكيمي ونايف أكرد ولعب معهم لاعبين اغلبهم عمرهم لعبو مع بعضهم البعض، لدرجة ان المنتخب كان مستحوذ على الكورة ولكن كايبان لاعب بعشوائية، وهذا الشي كايزيد يخلي الشكوك تكبر حول القدرة ديالو على قيادة المنتخب المغربي للتتويج بكاس أفريقيا 2025, خصوصا وان مستوى ليكيب ناسيونال ضد ليسوتو كايجي بعد 3 ايام من الماتش ضد الگابون، واللي واخا ربحوه ليكيب ناسيونال بنتيجة 4 لواحد، ولكن مستواهم كان مقلقل خصوصا فوسط التيران والدفاع.

وخرج وليد الركراكي كايحاول يدافع على الاختيارات ديال. وقال: “مع الرباح بـ4 لواحد على الگابون كان يبان لنا الماتش ساهل ضد ليسوتو اللي كانو دارو التعادل فنيجيريا وكيدافعو مزيان وما طلقوش حتى للدقيقة الأخيرة واللي جانا مزيان هو الاحتياط عندنا فيه الدراري ملي كايدخلو عندهم الإمكانيات وهذا الشي اللي عاونا نربحو ومن بعد الجانب السلبي هو الشوط الاول لعبنا بريتم ماشي ديالنا وكايصحاب لنا عندنا الوقت باش نماركيو وهاد الماتشات خاصهم يتحلو وشفتو ملي ماركينا جاونا 2 او 3 الفرص باش نزيدو للقدام”.

وكمل الركراكي وهو كايحاول يلقى الأعذار وقال: “هذا احسن ماتش باش نتعلمو ودخلنا اللاعبين الشباب ومازال غايتعلمو وغايكبرو وما غانقولوش ما عندهمش المستوى باش يتعلمو بالعكس عندهم بالحق هادو هما الماتشات فين يتعلمو والفرق بين منتخب اقل من 23 عام والمنتخب الاول كانعرفها داكشي علاش كاندمجو اللاعبين بالشويا، وملي كاتشىوف اليوم ادم ازنو وحنا فرحانين حيث دار ماتش كبير أنا ما عاونتوش ولكن هو اللي دار التحدي، وكيف قلت غانبدل 90% ديال الفريق وشفنا فالشوط الاول الريتم باش يولفو يلعبو بيناتهم وهذا الشي ما كانش ساهل واخا جاونا الفرص باش نماركيو ونحلو الماتش بالحق هما هادو الماتشات ديال لافريك وحتى هما غايتلعمو وحنا هاد بغيناهم على هذا الشي وداكشي علاش بدلت بدات 90% ديال الفريق باش يكون عندنا شويا ديال الاختلاف وتشوفو شكون يقدر يعطي الإضافة وكنت عارف ان الاحتياط فيه لاعبين اللي يقدرو يحلو المشاكل والحمد لله عندنا لاعب بحال حكيم زياش وبراهيم دياز  يوسف النصيري وسفيان رحيمي اللي دخل مزيان وعبد الصمد الزلزولي ومازال اليأس بنصغير ملي غايرجع باش يكونو ديما عندا حلول، بالحق اليوم فرحانين بالنتيجة وبالنسبة للمحتوى راه ماتش مزيان باش نتعلمو مع ليبلوك با ونخدمو عليهم ومزيان”.