كود – كازا //

العائلات المغربية فالسعودية والمقيمين والمعتمرين كلهم كيسولو واش السفر للملكة مأمن من بعد الهجمات الأخيرة اللي دارتها جماعة الحوثيين بالصواريخ والمسيرات على مطارات السعودية، خصوصا من بعد القصف اللي تسبب فموت الشابة المغربية “أحلام بوكنة” فمطار أبها وهي كتوجد ترجع لبلادها.

لحد الساعة وزارة بوريطة ما خرجات حتى بشي تحذير رسمي كيمنع أو كينصح بعدم السفر للسعودية أو تحذير رسمي للمواطنين المغاربة كيطالبهم بتجنب السفر أو مغادرة الأراضي السعودية.

الوزارة دارت غير بلاغ رسمي نهار 11 أكتوبر 2026، عبرات فيه على الإدانة اللي كتمس سيادة وأمن السعودية، ولكن مشفناش نهائيا خطوات احترازية أو نصائح خاصة بالمغاربة اللي ناويين يمشيو للسعودية.

الوضع فالمنطقة باقي مرون وجماعة الحوثي خرجات ببيانات كتحذر فيها شركات الطيران والمسافرين من استعمال الأجواء والمطارات السعودية، وفنفس الوقت، دول أخرى بحال أمريكا وبريطانيا وإسبانيا رفعات مستويات التحذير لمواطنيها وفرضات قيود على تنقلات موظفيها فالمملكة.

وحتى السلطات السعودية دعات كاع المسافرين باش يتواصلوا مباشرة مع شركات الطيران للتأكد من حالة الرحلات والبرمجة ديالها قبل ما يتوجهوا للمطارات، باش يتفادوا أي بلوكاج جراء الإجراءات الأمنية الاستثنائية.

ومع هاد الوضع، كيبقى غياب أي تحذير رسمي من الخارجية المغربية كيطرح تساؤلات على سلامة المغاربة فالسعودية، وسط استمرار التهديدات الأمنية، فانتظار توضيحات رسمية كتحدد المخاطر والتدابير الاحترازية قبل السفر.