كود سبور//

متمسكين باريس سان جرمان الفرنسي بالنجم المغربي أشرف حكيمي، اللي كايعتابروه واحد من ركائز الفريق اللي معولين عليهم فالمستقبل، وهذا الشي خلى الإسباني لويس إنريكي مدرب PSG يخرج اليوم الجمعة ويمدح اللاعب اللي مرشح إما للتجديد مع النادي بعقد طويل أول يمشي لفرق كبيرة فأوروبا.

مدرب باريس سان جرمان استغل اليوم الجمعة الندوة الصحافية اللي كاتسبق ماتش PSG وفريق لانس ضمن الجولة 9 من بطولة فرنسا، وقال فتصريح له: “عمرني شفت من قبل مع شي ظهير أيمن احسن من أشرف حكيمي”.

وكمل لويس إنريكي المدرب الحالي لباريس سان جرمان واللي هو ايضا واحد من أساطير البارصا، وقال على حكمي: “مازال عندو الوقت فين يزيد يطور راسو وعندو إمكانيات كبيرة”.

تصريحات لويس إنريكي جات بعدما خرجت تقارير إعلامية أوروبية، كاتقول أن كل من ريال مدريد الإسباني ومانشستر سيتي وليفربول النگلزا ناويين ينافسو باريس سان جرمان على خدمات اشرف حكيمي، واخا أن الإعلام الفرنسي كايقول بلي حكيمي اتفق مع PSG على تمديد العقد اللي بينهم من 2026 إلى 2029.