الرئيسية > آراء > واش كانت صفقة يطيح فيها الطرمباطي الملياردير اللي عا تا بان عصابة “الصحافيين” باش ينساو قضيتو مع الديوانة ومع بنشرقي؟ كيفاش واحد فاسد بحالو خربق وهدد واختارق القضاء ولى محارب للفساد وهو الفساد بعينو
22/11/2020 11:00 آراء

واش كانت صفقة يطيح فيها الطرمباطي الملياردير اللي عا تا بان عصابة “الصحافيين” باش ينساو قضيتو مع الديوانة ومع بنشرقي؟ كيفاش واحد فاسد بحالو خربق وهدد واختارق القضاء ولى محارب للفساد وهو الفساد بعينو

واش كانت صفقة يطيح فيها الطرمباطي الملياردير اللي عا تا بان عصابة “الصحافيين” باش ينساو قضيتو مع الديوانة ومع بنشرقي؟ كيفاش واحد فاسد بحالو خربق وهدد واختارق القضاء ولى محارب للفساد وهو الفساد بعينو

كود هناء ابو علي الدار البيضاء ///

قضية اعتقال مدير “علاش تيفي” محمد القاسمي و”لونكيط” حاتم حجي ومصور صحافي ثالث فشبكة ابتزاز رجال اعمال فكازا مازال ما سالاتش. فالحقيقة يالله غادية تبدا. اللي بان من المحاضر اللي تسربات لحد الان ان الهدف ماشي هما الصحافيين اللي ابتزو رجال اعمال كثار وقضاة ووو بل هي حرب كبيرة بزاف فجهاز القضاء بالمغرب. قضاة كيديرو ما بغاو. فيهم قضاة فاسدين غاديين يرهنو لبلاد كلها.

رئيس النيابة العامة عبد النبوي حاس براسو محتجز مع افراد هاد العصابة اللي كاينين فجهاز القضاء. خاص دعم كاع اجهزة الدولة اللي كيهمها مصالح لبلاد باش يتم محاربة هاد العينة.

نبداو بهادا اللي سميتو احمد الطرمباطي. ولد لعرايش اللي كان عند عائلتو علاقة بقضية قديمة كانت نشراتها “المساء” حول عرس المثليين اللي فيه وكلاء الملك. من داك الوقت رحل مع عائلتو لكازا. فرمشة عين ولى ملياردير وولى كيخلع كلشي. عندو قضايا كثيرة مع نوطيرات مع رجال اعمال … اشهر قضية كانت شراء “بروديك” من رجل الاعمال ومولاها بنشرقي اللي دابا مشدود بسباب شيكات بدون رصيد وما عرفناش شكون ورا هاد الشد. بنشرقي خرج من المغرب بطريقة مريبة فطونوبيل هو كيقول باللي خرجو الطرمباطي. كانت خطة باش يتخلص منو ويتحكم فشركتو باتفاق مع افراد من عائلة بنشرقي.

وقع تزوير فوثائق فمحاضر الشركة والقضية عند الفرقة الوطنية واستامعو للطرمباطي وكيف كل مرة كيخرج منها.
الطرمباطي عندو قضية مع الديوانة. علاش ما تفتحش تحقيق من قبل مدير الجمارك.

دابا فالمحاضر اللي خرجات على قضية عصابة الصحافيين صرح هاد الطرمباطي للفرقة الوطنية باسرار خطيرة على القضاء. قال باللي جوجت القضاة هما للي كيدعمو ويخدمو مع افراد الشبكة اللي تشدات كيدهرو على مول “اعلاش تيفي” و”لونكطيط” ومصور صحافي اخر.

وباللي تلاقى مع القاضي اللي كاين فالرباط فالمحمدية وقال ليه باللي هو اللي كان ورا فيديو على رئاسة النيابة العامة باش “يجبد ليه وذنيه” وباللي حاتم القاسمي وحاتم حجي بجوجهم خرجو مواضيع تضرب فرئيس النيابة العامة.

وباللي تلاقى مه قاضي ثالث فكازا وقال ليه عطي لفلوس للمصور الصحافي اللي مشدود فالقضية. وباللي القاضي اللي فالرباط خرج مقالات ضد الرئيس المنتدب للسلطة القضائية المصطفى فارس فمواقع هادوك المتهمين. وباللي كاين قاضي رابع دخل فحرب مع قاضي اخر وخرج عليه اخبار وسماه “مول ميني كوبر”.

اللي شاف هاد المحضر يعرف ان هاد الملياردير كيمثل الفساد بعينو. اولا دار صفقة مع محامين وبحضور محامي ديالو فيها غادي يعطي لبنشرقي 500 مليون و300 مليون يوزعها على السماسرية اللي فيهم عصابة الصحافة. هاد الشي تكبت وموجود.

كيفاش واحد بحال هادا غادي يغير موقفو ويدير كمين. طبعا كاينة جهات دخلات فهاد الملف. جهات كان فصالحها تضرب قضاة خراين وتقضي على افراد عصابة الصحافة.

باش تفهمو هاد الامور الغريبة هو وتاحد اسمو هشام الشعراوي كان دار فيديوات فضح الطرمباطي وطريقة شراؤو لشركة الصباغة “برويك” من بنشرقي. نفس الشخص غير اقوالو قدام الفرقة الوطنية.

قضية عصابة الصحافة جزء من حرب بين القضاة قبل الانتخابات اللي غادية تكون العام الجاي. خروج اسماء قضاة وادانتهم بهاد التصريحات من قبل اشخاص بحال الطرمباطي كتأكد هاد الشي. هو براسو هادي اشهر وهو كيعطي الرشوة وخاصو يتابع على داك الشي. اليوم بغى يقدم راسو نزيه. اش هاد الشي. كيفاش يكون واحد بحالو نزيه. كيفاش واحد فظرف قياسي ولى ملياردير وحتى جهاز فالدولة ما سولو منين جبدتي هاد الثروة.

كيفاش ولى كيتحكم فالقضاء وفاجهزة اخرى وولى طاشرون بعد ما كان فالتعشير وباقية قضايا كتسناه. فمحضرو كاين استهداف لقضاة وادانة ليهم وتبرءة اخرين.

الخوف هو ان هاد الشي يكون ثمنو هو يمحيو ليه وسخو لكثير. الوحيد اللي باقي فيه الامل ويقدر يقاوم هاد الشي هو عبد النبوي رئيس النيابة العامة. واش غادي يقدر يستمر فالمقاومة بوحدو؟ باش نعرفو غاديين نشوفو مأل ملفات ضد هاد الطرمباطي. واخا يلقى حل مع بنشرقي راه كاين التزوير يعني خاصو يتحاكم. خاص العدالة اللي بلا بيها لبلاد مشات خلى وحكمونا امثال الطرمباطي.

موضوعات أخرى

05/12/2020 19:30

منظمة الصحة العالمية : خاص الڤاكسان ضد “كورونا” يوصل لجميع الناس فكل البلدان فالعالم .. و”نظرية المؤامرة” كتساهم فانتشار الفيروس

05/12/2020 19:00

المغربية هاجر مصنف المتوجة بجائزة ” Women Tech 2020 ” كشفات على مشاريعها فالذكاء الاصطناعي وصرحات لـ”كود”: هذي مفخرة لكل النساء المغربيات ودليل على أن المرا المغربية قادرة تعطي فجميع المجالات

05/12/2020 18:30

فرنسا جرات على 66 متطرف و صيفطاتهم لبلاداتهم. وزير الداخلية الفرنسي : هادي غي البداية مازال غادي نرحلو خوانجية آخرين .. لاليست طويلة