ݣود-وكالات//

علن الرئيس الفرنسي إيمانويل ماكرون، فخطاب قدام “اللواء 27 مشاة جبلي” فجبال الألب، على إطلاق خدمة عسكرية تطوعية جديدة، الهدف منها زيادة عدد الشباب لي يقدرو يتعبّاو فحالات الطوارئ الوطنية.

الخدمة غتبدا فصيف 2026، وغا تستهدف الشباب بين 18 و19 عام، سواء دراري أو بنات. المشاركين غيتختارو فواحد النهار اللي سميتو “يوم الاختيار”، على حساب دوافعهم واحتياجات الجيش.

مدة السىربيس 10 شهور، كيبداو بشهر تدريب أساسي على الحياة العسكرية، كيفاش يتعاملو مع السلاح والأساسيات ديال الجيش، ومن بعد كيدوزو 9 شهور فالوحدات العسكرية وسط فرنسا، وكيقبّلو راتب منتظم وكيشاركوا فالمهام كاملة، بما فيها مهام الحراسة.

ماكرون أكد باللي هاد البرنامج ماشي باش يرجعو للخدمة الوطنية الشاملة، ولكن الهدف هو استيعاب 3000 شاب ف2026، و10000 ف2030، و50000 ف2035. البرنامج مركز على الجاهزية والاحترام، وما عندوش علاقة بأي صراع خارجي، بحال الحرب فأوكرانيا.

ماكرون جاب النموذج النرويجي كمثال، حيث 15٪ من الشباب كيأديو الخدمة العسكرية لمدة 12 شهر، وكيتختارو على حساب الكفاءة والدوافع ديالهم، وهذا اللي خذاو بعين الاعتبار باش يصممو الخدمة التطوعية الجديدة.