كود الرباط//

ليوم، فمدينة سلا، وكيما سبق وشارت ليه “كود”، غا تعقد دورة المجلس الوطني لحزب الأصالة والمعاصرة، وهي أول دورة بعد المؤتمر الوطني الخامس للحزب للي تعقد ف فبراير الماضي ونتاخب قيادة ثلاثية كتنسقها فاطمة الزهراء المنصوري.

فاطمة الزهراء المنصوري، أو بنت الباشا كيما كتسمى، عندها ليوم أول امتحان حاسم باش تفرض قيادتها لحزب التراكتور.

ثلاثة د النقاط أساسيين غا يصادق عليهم المجلس الوطني للبام اليوم:
– أولا، تشكيلة المكتب السياسي، وغا يبان واش فعلا هاد التشكيلة ما فيهاش متابعين ف قضايا الفساد وسوء تدبير الشأن العام ومتهمين فقضايا انتهاك حقوق الإنسان،
– ثانيا، انتخاب نواب رئيسة المجلس الوطني للبام نجوى كوكوس، وغا يبان واش تمت المحافظة على التوازن الهيكلي للحزب بين تيار اليسار والحقوقيين، من جهة، وتيار الأعيان ورجال الأعمال وصحاب اللعاقة، من جهة أخرى؛
– وأخيرا، وهادي هي المعضلة لكبيرة، المصادقة على مشروع ميثاق السلوك والأخلاقيات، وللي كينص على منع الترشح باسم الحزب على كل من تبثت لديه شبهة التورط في قضايا فساد وسوء تدبير الشأن العام من خلال تقارير المجلس الأعلى للحسابات والمفتشيات العامة للوزارت.

دورة المجلس الوطني ديال البام صعيبة وحاسمة، وكاتجي بعد الرسالة الملكية للي صافطها جلالة الملك للندوة للي دارها البرلمان يوم 16 يناير الفايت وللي دعا فيها سيدنا البرلمان إلى إقرار مدونة للسلوك والأخلاقيات تكون ملزمة قانونا.

وكان البام أول من تفاعل مع هاد الدعوة الملكية وللي جات تقريبا بصيغة أمر ملكي بعدما منع البرلمانيين ديالو للي عندهوم وسخ الفساد في الضواصا ديالهم من الترشح للمناصب في أجهزة مجلس النواب في التجديد النصفي، وتفاعل معاها أيضآ حزب الاستقلال وخاصة على إثر الأحداث للي عرفها المؤتمر 18 للحزب بعد قضية نور الدين مضيان-رفيعة المنصوري وقضية التصرفيقة فانتخاب المجلس الوطني لحزب الميزان. حزب الأحرار بدورو بدا فإبعاد بعض الوجوه للي عندهم شبهة فساد فتدبير الشأن العام من الترشح للمناصب أو للحديث بإسم الحزب فجلسات عمومية أو فمناسبات.

بطبيعة الحال، محاربة الفساد والمفسدين فالحياة السياسية صعيبة، وهاد الشي للي دفع فاطمة الزهراء المنصوري أنها تدعي الأحزاب إلى تبني ميثاق شرف بعدم فتح الأبواب خلال الاستحقاقات المقبلة ف 2026 أمام كل من منع من الحصول على التزكية للترشح لهاد الانتخابات بسبب شبهة فساد.

دعوة فاطمة الزهراء المنصوري تفاعل معها مباشرة حزب التجمع الوطني للأحرار على لسان واحد من وجوهه الصاعدة وهو المستشار البرلماني كمال أيت ميك وللي قال فكلمة فمجلس المستشارين بللي الأحزاب مدعوة للقطع نهائيا مع المفسدين للحياة السياسية، كما تفاعل معها أيضا حزب الاستقلال على لسان لحسن حداد للي دعا فجلسة مناقشة الحصيلة المرحلية للحكومة أحزاب الأغلبية لصياغة ميثاق مشترك لأخلاقيات العمل الحزبي.

دورة المجلس الوطني للبام هي فالحقيقة امتحان أمام الأغلبية الحكومية كلها وغا يبان فيها مدى قدرة هاد الأحزاب فعلا على محاربة الفساد والحد من سوء التدبير والتسيير للشأن العام وغلق أبوابها نهائيا أمام المفسدين للحصول على مناصب أو امتيازات أو مكاسب مخالفة للقانون، تنفيذا للتعليمات ديال سيدنا.