گود سبور//

دخّلت كلمة فوزي لقجع رئيس الجامعة الملكية والقيادي الاول بحزب الأصالة والمعاصرة، ملي قال ان “تيران الحسن الثاني فبنسليمان غادي يتلعب فيه فينال مونديال 2030″، (دخّلت) الخلعة مع الإسبان، والصحافة الإسبانية ولات كاتقلب على الاعتراف بتيران سانتياگو بيرنابيو بأي طريقة، واخا من عند أطراف ما عندهم علاقة بهذا الملف، وهذا الشي اللي كان مع البرتغالي جوزي مورينيو مدرب ريال مدريد الإسباني، واللي عبّر لهم على الدعم ديالو لترشح تيران فرقتو سانتياگو برنابيو لاستضافة نهائي كاس العالم 2030، وهذا الشي طبيعي حيث هذا تيران النادي فين خدام دابا وكياكل الخبز.

الصحافة الإسبانية استغلو ندوة مورينيو اليوم الجمعة قبل من ماتش ريال مدريد ورايو فاليكانو اللي ملعوب غدا السبت فتيران سانتياگو بيرنابيو، ضمن الدورة 5 من بطولة الصبليون، وسولوه على فين يبغي يتلعب فينال مونديال 2030، وجاوب وقال: “التيران فين غايتلعب حاجة، وفين تبغي يتلعب حاجة اخرى، سمحوليا ولكن نبغيه يتلعب فلشبونة”.

مورينيو قال انه عارف القدرات التنظيمية ديال كل بلد من الدول الثلاثة (المغرب، إسبانيا، البرتغال)، ووضح بأن البرتغال غادي تكون راضية باستضافة عدد من ماتشات كاس العالم 2030.

وكمل مورينيو وهو كايجاوب على فين يبغي يتلعب فينال مونديال 2030، وقال: “الجواب ديالي وانا ما كانقولش هذا الشي حيث راني مدرب ريال مدريد، ولكن راكم كاتعرفوني مزيان، والى كان الواحد يقدر يلعب فتيران أسطوري وتاريخي فين لعبو شي وحدين من افضل اللاعبين فالتاريخ، راه خاص يكون هنا”. في إشارة منو لتيران سانتياگو برنابيو.

للإشارة فالبرتغال ولشبونة ما مرشحين أصلا لاستضافة نهائي كاس العالم 2030، والفينال منافس عليه المغرب بتيران الحسن الثاني الكبير فبنسليمان (نواحي الدار البيضاء) مع اسبانيا اللي مرشحة جوج تيرانات هما سانتياگو بيرنابيو ديال ريال مدريد، والكامب نو ديال برشلونة.