كود سبور//

غايكون الجمهور حاضر فماتش شباب السوالم والرجاء الرياضي الجمعة الجاي، برسم الجولة السادسة من منافسات البطولة الاحترافية لكرة القدم.

وكشفت مصادر مطلعة من نادي شباب السوالم، أن الماتش بين الفريق والرجاء الرياضي اللي غايتلعب الجمعة الجاي فالتيران البلدي ديال برشيد مع 8 الليل، غايكون فيه الجمهور، عكس بعض الماتشات الماضية اللي ما كانش فيه الجمهور فنفس التيران بحال ماتش حسنية أكادير اللي استضاف الوداد على أرضية نفس الملعب قبل أسبوعين بلا جمهور.

ومن المنتظر يعرف ماتش شباب السوالم والرجاء الرياضي حضور مهم لجمهور الرجاء الرياضي، خصوصا وأنه أول ماتش للفريق الأول ديال الخضرا بعد التوقف الدولي، وكايجي بعد نتائج إيجابية حققها الفريق قبل التوقف الدولي، وهو أول ماتش للمدرب الجديد ريكاردو سا بينتو النسور.