كود سبور//

خرج الدولي الفرنسي كيليان مبابي يطمئن الجماهير ديالو، بعدما تعرض للإصابة فالنيف، خلال ماتش فرنسا والنمسا البارح الاثنين، برسم الجولة الأولى من دور مجموعات كأس أوروبا.

وفالوقت اللي كشفت تقارير إعلامية فرنسية أن كيليان مبابي غايدير عملية جراحية على النيف ديالو حيث تهرس فيه، ونفتها اخرى، خرج النجم الفرنسي، يخلق الدعابة مع الجمهور ديالو، اللي بداو كيهضرو على مواقع التواصل الاجتماعي واش غايدير الماسك على نيفو بحال سلاحف النينجا، حيث زعما كيشبهوه بـtortue ninja، تفاعل معهم مبابي وكتب على الحساب ديالو فتطبيق “X” :واش عندكم شي فكرة على الأقنعة؟”، زعمة شنو الماسك اللي غايجي معه.

وكانت جريدة “ليكيب” الفرنسية كشفت أن كيليان مبابي تهرس فالنيف ديالو، وغايدير عملية جراحية فسبيطار دوسردورف الجامعي فلالمان اللي منظمة كاس أوروبا 2024، فالوقت اللي قالت قناة RMC الفرنسية أن كابيتان فرنسا غايرتاح مزيان وما غايديرش العملية بعدما كان الفحوصات مطمئنة.