گود سبور//

حاسمين الجامعة الملكية المغربية لكرة القدم برئاسة فوزي لقجع والناخب الوطني وليد الركراكي المشرف العام على المنتخبات الوطنية والإدارة التقنية الوطنية، فنوع اللاعبين اللي غايشاركو فكأس العرب اللي غاتكون فقطر في شهر دجنبر 2025، وقبل منها اللي غايشاركو فكأس إفريقيا للمحليين شهر فبراير المقبل بتنزانيا وأوگاندا وكينيا، وسيتم الاعتماد في المسابقتين على المنتخب الوطني المغربي لأقل من 23 عام، مكون من لاعبين ديال البطولة الاحترافية من مواليد عام 2000 للفرق، تحت قيادة طارق السكتيوي مدرب هذه الفئة السنية، باش هذا النوع من اللاعبين ياخدو الفرصة ديالهم ويبينو على إمكانياتهم وهذا الشي غايعطي للركراكي والطاقم ديالو فالمنتخب المغربي الأول لاعبين صورة أوضح على قدرات اللاعبين المحليين الشباب فالبطولة الاحترافية وشكون فيهم اللي يمكن الاعتماد عليه مستقبلا فالمنتخب الأول.

وهذا يؤكد أن مشاركة المغرب فكاس العرب بقطر ما بين 1 و18 دجنبر 2025، لن تؤثر على المنافسة ديالو فكأس إفريقيا2025 اللي غاتبدا بالمملكة بعد ثلاثة أيام من نهاية كاس العرب بقطر، وبالضبط يوم 21 دجنبر 2025 واغتسالي يوم 18 يناير 2026، عكس هاديك المخاوف اللي انتشرت على مواقع التواصل الاجتماعي بعد إعلان قطر على موعد انطلاق ونهاية كاس العرب.

الناخب الوطني وليد الركراكي كان كشف في ندوة صحافية ماضية وبالضبط يوم 3 أكتوبر 2024، أن كاس العرب وكأس أفريقيا للمحليين غاتولي تعطى فيهم الفرصة للاعبين الشباب من البطولة الاحترافية، وقال: “مع الرئيس ومع الإدارة التقنية الوطنية بغينا المنتخب فكأس العرب وفالشان يشارك باللاعبين أقل من 23 عام، باش نطلعو النيفو ديال اللاعبين الشباب اللي فالبطولة الاحترافية، ونعطيوهم يلعبو مسابقات كبيرة باش حتى هما يكبرو فهاد البطولات”.

وليد الركراكي المشرف العام على المنتخبات الوطنية، أكد أنه ما بقاش الاعتماد على اللاعبين الكبار فالسن فالمنتخب المحلي، وقال: “حنا ما كايهمناش اللاعب اللي عندو 32 ولا 33 عام يمشي يلعب الشان ويمشي يلعب كأس العرب ويبين راسو باش يمشي من بعد ينسي شي عقد فشي فريق، حنا اللي كايهمنا هو التكوين”.

وسالا الركراكي الكلام ديالو وحسم الموضوع وقال: “حنا مشينا فواحد الطريق باش نعطيو فرصة للاعبين الشباب باش حتى هما يكبرو، يعني فكأس العرب والشان السياسة ديالنا هي نمشيو بلاعبين أقل من 23 عام، بلاعبين اللي زايدين من عام 2000 للفوق، وعلاش ما نمشيوش حتى مع لاعبين اللي عندهم 19 عام ويمشيو يتعلمو ويكبرو مع هذه المسابقات وهذا الشي اللي كايهمنا ونعطيهم فرصة فين يبينو الإمكانيات ديالهم ومشاركتهم فالشان وكأس العرب تقدر تعطينا رؤية أوضح وحلول اكثر على مستقبل البطولة الاحترافية وعلى المنتخب الوطني المغربي الأول”.