كود -كازا //

الموقع ديال التوقعات Polymarket لغا واحد التقميرة كانت كتخلي اللعابة يقمرو ويلعبو على ”واش غادي ينفجر شي سلاح نووي ف 2026“، هاد التقميرة قلقات المتابعين وخلات انتقادات كبيرة فالسوشيال ميديا.

هاد التقميرة النووية قدرات تجيب فالبدية 650 ألف دولار قبل ما يتم إغلاقها بشكل رسمي فالموقع لي دار عليها بزاف ديال الاحتمالات فاللعب، بحال ”واش ممكن يوقع الانفجار قبل مارس، ولا قبل يونيو، ولا حتى فشي وقت قبل عام 2027‘‘.

المنشور ديال الموقع تحذف حتى من (Twitter)، واللي كان كيقول باللي القمارة فالسوق عطاو احتمال واصل حتى لـ22 فالمئة باش يوقع تفجير نووي هاد العام.

هاد التقميرة دارت الصداع حيث بزاف ديال المتابعين اعتابرو اللعب على كوارث عالمية بحال هادي تصرف ماشي أخلاقي وكيبين كيفاش بعض الناس ممكن يستافدو مالياً من أحداث ديال العنف فالعالم.

بعض المحللين قالو إن هاد النوع من الأسواق ممكن يخلي عند شي ناس معلومات على تطورات عسكرية ولا سياسية لي كتخليهم يزعمو يلعبو ويربحو قبل ما توصل الأخبار للعموم.

الهضرة قوات بالخصوص مورا تقرير نشراتو شركة تحليل البلوكشين Bubblemaps، واللي بينات باللي شي حد ربح تقريباً مليون دولار من تقميرات كانت كتوْقع ضربات عسكرية ديال مريكان ضد إيران قبل ما توقع الهجمات .

النقاش على هاد النوع من المراهنات وصل حتى المريكان، مني دعاو عدد من أعضاء مجلس الشيوخ بقيادة Adam Schiff هيئة التنظيم المالي Commodity Futures Trading Commission  باش دير قوانين جديدة كتمنع التقميرات المرتبطة بموت الناس ولا المصايب الكبيرة .

مع هاد الانتقادات كيبان بلي أسواق التوقعات المرتبطة بالأحداث الجيوسياسية غادي تولي محضية ومقننة، خصوصاً مع الخوف من استغلال المعلومات الحساسة وتحول الأزمات العالمية لفرص للربح.

https://www.businessinsider.com/polymarket-nuclear-detonation-market-bet-backlash-removal-2026-