أميمة عطية ـ كود كازا///

طلعات أسعار النفط العالمية، هاد صباح الاثنين 10 غشت 2026، وسط استمرار لغموض بخصوص موعد إعادة فتح مضيق هرمز، اللي كيبقى واحد من أهم الممرات البحرية لنقل النفط فالعالم.

وسجل خام برنت ارتفاع بـ91 سنت، بنسبة 1.09%، باش يوصل لـ84.46 دولار للبرميل، بينما زاد خام غرب تكساس الوسيط الأمريكي بـ61 سنت، بنسبة 0.78%، ووصل لـ78.79 دولار للبرميل.

وجا هاد الارتفاع بعدما كانت أسعار النفط هبطات بأكثر من 7% السيمانة اللي فاتت، وسط استمرار المفاوضات باش إيران وأمريكا يوصلو لاتفاق، ويتعاود يتحل مضيق هرمز وترجع حركة الملاحة فيه بشكل طبيعي.

وكتعيش الأسواق الدولية حالة من الترقب، ولخوف من اضطراب إمدادات النفط العالمية، لي يقدر يدفع بالأسعار انها ترتفع فالمغرب، اللي كيتأثر بشكل مباشر بتقلبات أسعار النفط فالأسواق الدولية.