كود الرباط//

علمت “گود” من مصدر حزبي، ان ضغوطات كبيرة كيمارسها سعد بنمبارك زوج العمدة السابق، باش ياخد التزكية قبل ساعات قليلة من حسم قيادة الاحرار من المرشح لي غادي يخوض الانتخابات الجزئية فدائرة المحيط المزمع تنظيمها يوم الخميس 12 شتنبر 2024.

فهاد الانتخابات الجزئية، التحالف الثلاثي (الاحرار، البام والاستقلال) غادي يدعم مرشح الاحرار، التزامات بميثاق الاغلبية. وغذا الاحرار غادي يحسم فالتزكية لمن تعطا.

الغريب حسب مصادر حزبية هو اصرار بنبمارك على الترشح وباغي التزكية باش مكان، رغم انه صاحب فضيحة تفويت سكن وظيفي لمرا ماشي موظفة، غير هادي خصها تحقيق قضائي لأنه فيه شبه تبديد المال العام، وزيد عليها تقرير المجلس الاعلى للحسابات حول تدبير شركة رباط باركينغ في عهده.

ومن المنافسين ديال بنمبارك، كاين أمين صادق، نائب عمدة الرباط، وأحد الفاعلين الاقتصاديين بالعاصمة، لي دخل على خط الترشح للانتخابات الجزئية.

أمين صادق، هو حاليا المرشح الأكثر حظا في الحصول على التزكية من قيادة حزب التجمع الوطني للأحرار، حيث يعتبر أحد أبرز نواب عمدة الرباط فتيحة المودني، مكلف بالملف الاقتصادي، وله مكانة وازنة وسط المستشارين والنواب من مختلف الأحزاب (معارضة وأغلبية)، ويعرف أنه شخص يشتغل في صمت وهدوء بعيدا عن الأنظار. لكن كيواجه واحد من الاعيان لي كيتحكمو فالتزكيات.

ويواجه صادق، الذي تقدم بملف ترشيحه لحزب الأحرار، مناورات من خصمه سعد بنمبارك، زوج العمدة السابق اسماء اغلالو، وصاحب فضيحة تفويت سكن وظيفي بثمن رخيص لسيدة ماشي موظفة ملي كان رئيس المجلس الاقليمي فالرباط.

بنمبارك الذي عرفت فترة تسييره لشركة رباط باركينغ خروقات كثيرة وعجز مالي بلغ 2 مليار سنيتم، كيروج على راسو بلي عندو ضمانات كثيرة من قيادة الحزب والاعيان ديال الرباط، ولكن ظهور مرشح آخر (امين صادق) يتميز بالنزاهة ولم تسجل عليه خروقات تدبيرية تخص الشأن العام، إضافة إلى أنه كان سببا رئيسيا في سقوط معقد البرلماني عبد الرحمان واسلام عن دائرة المحيط، بعد شكاية تقدم بها للقضاء.

بنبمارك سبق العرس بليلة، ودار لقاءات كثيرة وولائم كيعرض على منتخبي واعيان العاصمة باش يدعمو ترشحو للبرلمان فدائرة المحيط باسم حزب التجمع الوطني للاحرار.

بنمبارك باغي دعم جميع الاطراف السياسية  ومشا تصالح مع واحد من الاعيان (امين مال سابق لحزب البام) عبد الرحيم بنهمو اللي تصبغ بالازرق ومشا مع الحمامة، (هادشي دارو بنبمارك) باش يضغط اكثر على قيادة الحزب تعطيه التزكية، خصوصا في ظل غياب اي مرشح بشكل رسمي من طرف الحزب، وفي ظل ضعف البروفايلات المرشحة لخوض الانتخابية الجزئية في دائرة الموت (المحيط) بالرباط.

الاحرار تالف بين مرشحين كثار، منهم عادل الاتراسي للي بغا حتى هو يترشح، الاتراسي معروف بلي صديق الخليجيين بالرباط، خصوصا الاماراتيين، وهو رئيس مقاطعة السويسي لي فيها مقرات وفيلات السفارات والسفراء، وكذلك ظهور اسم جديد هو امين صادق، اضافة الى السكة القديمة لي كيتزعمها سعد بنمبارك المدعوم من البام.

الغريب هو ان البام كيدعم بنبمارك، كيفاش حزب كان داير حروب ضد زوجة بنبمارك واللي هي العمدة اسماء اغلالو، دبا كيدعمو.