كود سبور//

كايعيش المنتخب الوطني المغربي وضع استثنائي، قبل اشهر قليلة من كاس العالم 2026، سوا بخصوص الوضع ديال الناخب الوطني اللي الإشاعات كاتروج بكثرة على المستقبل ديالو واخا الجامعة الملكية المغربية لكرة القدم، كانت خرجت بلاغ اكدت فيه ان وليد الركراكي ما قدمش الاستقالة ديالو، او وضعية عدد من اللاعبين وعلى راسهم الكابيتان اشرف حكيمي اللي كايدوز دابا من أصعب مرحلة فحياتي بعد اتهامو بالاغتصاب ففرنسا.

اليوم الثلاثاء تحال الدولي المغربي اشرف حكيمي نجم باريس سان جرمان الفرنسي على المحكمة ففرنسا بتهمة اغتصاب بنت كانت دعاتو عام 2023، وكاتقول انه تعدى عليها جنسيا، فالوقت اللي النجم المغربي خرج على تطبيق X واكد مرة أخرى البراءة ديالو، وقال انه حتى هو كايتسنى هذه المحاكمة باش تبان الحقيقة وكلشي يعرف انه بريء.

هذه المستجدات بلا شك غادي كون عندها تأثير على النفسية ديال كابيتان المنتخب الوطني المغربي، واخا هو كايبان قوي وتايق فراسو، ولكن هذه الأزمة اللي كايعيش خاصها مواكبة خاص خصوصا وانه النجم الاول ديال المنتخب الوطني المغربي والكابيتان ديال ليكيب ناسيونال، وهذا الشي إلى ما كانش فيه تدبير مزيان راه ممكن يرخي بالظلال ديالو على لگروب قبل 4 اشهر من كاس العالم 2026 فالميريكان وكندا والمكسيك، ومازال ما تعرف هذا الملف ديال حكيمي باش غادي يسالي وشنو الحكم اللي غادي يصدر فيه.

مع العلم ان اشرف حكيمي مول 27 عام واحسن لاعب افريقي لعام 2025، هو من اللاعبين اللي معول عليهم من طرف الجامعة الملكية المغربية لكرة القدم، لبناء مشروع المنتخب المغربي فالمستقبل القريب، وتأطير اللاعبين الجداد اللي كايجيو للمنتخب حيث هو مثال ديال اللاعب المحترف اللي قدر يعتمد على راسو يشق الطريق ديالو نحو كرة القدم العالمية.

دابا هذه المرحلة اللي كايعيشها المنتخب الوطني المغربي صعيبة بزاف، والأزمة اللي بدات بخسارة نهائي كاس أفريقيا واخا خسارة لقب كاتبقى واردة ولكن الطريقة باش تخسر الكاس وتدبير الناخب الوطني وليد الركراكي للبطولة، زائد المستقبل ديالو اللي ما واضحش حتى لدابا وكاتزاد عليهم هاد القضية ديل اشرف حكيمي والإحالة ديالو على المحكمة بتهمة الاغتصاب كايخلي الجمهور المغربي على الأعصاب ديالو، ومتخوف على حكيمي النجم الاول ديالو وعلى المنتخب المغربي ككل وواش غادي يقدر يخرج من هذه الأزمة دغيا وقبل مونديال 2026، اللي باغيين يحققو فيه إنجاز يكون على الأقل قريب من الإنجاز اللي تحقق فمونديال 2030.