كود الرباط//

علمت “كود” من مصادر مطلعة، بلي كاين حديث داخل بعض الأوساط المقربة من قيادة حزب العدالة والتنمية، عن مصالحة داخلية والهدف منها يرجعو عدد من القيادات اللي غادرت الحزب لنشاطهم السياسي والحزبي.

وحسب مصادر “كود” فإنه كاين سرية كبيرة فهاد المصالحة واللي كيتوسطو فيها قيادات بارزة، باش أولا يدير الصلح السياسي والتنظيمي بين الرموز التاريخية للبي جي دي، بحال المصالحة بين عبد الإله بنكيران ومصطفى الرميد، وعودة العثماني للمشهد وباقي الأطر والقيادات لي غبرات منذ تسونامي انتخابات 2021 واللي طاح فيهات البي جي دي للمراتب المتأخرة.

قيادي وإطار في البي جي دي، مبغاش يقول سميتو، قال لـ”كود”: “يلا رجع الرميد للحزب غانرجع.. واخا مستبعد دبا يرجع”، مضيفا: “على بنكيران يدير نقد ذاتي للتجربة ديالو بعدما شد الحزب مور انتكاسة 2021”.

“كود” سولت القيادي مصطفى الرميد، حول حقيقة هذه الوساطة، وجاوب بتحفظ :”لا تعليق”.

وجاء الحديث عن المصالحة الداخلية في حزب العدالة والتنمية، خصوصا بعد الحوار للي دار الرميد مع موقع صوت المغرب، وتبعه حوار لحسن الداودي مع نفس الصحيفة.

وعاش حزب العدالة والتنمية، أزمات داخلية متتالية، وتسببت الخسارة فانتخابات 2021 فإضعاف البي جي دي أكثر، وزاد عليه التحول فالخطاب السياسي ديال بنكيران للي تميز مؤخرا غير بالهجوم واستهداف حلفائه السابقين (البي بي إس) واستعمال خطاب ديني متطرف وغيرها من الخرجات غير الموفقة اللي كتزعج عقلاء البي جي دي.