كود سبور//

قرب يخرج التوني الجديد ديال المنتخب الوطني المغربي، اللي غايلعبو به الأسود خلال المرحلة المقبلة، وسالات مرحلة التوني الشهيرة اللي تعرف بزاف خلال مونديال قطر2022.

وغاتكشف شركة PUMA المتخصصة فالألبسة والمنتوجات الرياضية، اللي متعاقدة معها الجامعة الملكية المغربية لكرة القدم، يوم الجمعة المقبل 15 نونبر2024، على التصميم الجديد ديال توني المنتخب الوطني المغربي، اللي غايكون التصميم ديالو متشابه مع تونيات منتخبات مصر والكوت ديفوار وغانا والسنغال، مع اختلاف فالهوية ديال كل بلد.

وتعتبر شركة PUMA من الشركات الرائدة عالميا فاللبس ديال السبور، ومتعاقدة مع منتخبات وأندية كبيرة فعدد من الرياضات، غير هو راه كاينة انتقادات كثيرة للشركة، بخصوص التصاميم ديالها للمنتخبات الإفريقية، بحال التوني اللي كايلعبو به المنتخب المغربي مؤخرا، الكول ديالو ما زوينش وحتى الفصالة ديالو ما زويناش على اللاعبين، حيث كايبان الفرق فجودة وتصميم التوني ملي كايتصورو اللاعبين مع أنديتهم اللي شادينها شركات اخرى، وملي كايتصورو بتوني المنتخب المغربي اللي كاتصاوبو Puma.