گود سبور//

مازال اللاعبين د المنتخب السنغالي، زايدين فالاستفزازات ديالهم تجاه المغرب، وما باغيينش يحشمو، واخا القرار الصادر عن لجنة الاستئناف بالاتحاد الأفريقي لكرة القدم، القاضي بسحب كاس إفريقيا 2025 منهم، واعتبارهم خاسرين النهائي بنتيجة 3-0 أمام المغرب، ومنح اللقب للمنتخب الوطني المغربي، والمضحك أن السنغاليين كايعتارفو بانسحابهم من النهائي قبل ما يرجعو يكملو اللعب، ومشاو طعنو فقرار لجنة الاستئناف د الكاف عند الطاس وباغينها تحكم لهم.

وهاد المرة بابي گي لاعب السنغال فتصريح له: “حنا ببساطة أبطال إفريقيا، وربحنا الفينال فالتيران وقدام العالم، وملي تصفر بينالتي حتى شي مغربي ما بغا يوقف الماتش كلهم بغاو يضربو البينالتي، دابا علاش غادي نركزو على النتيجة النهائية؟”.

ورجع بابي گي للحظة وصول منتخب السنغال لمدينة الرباط فـTGV  جايين من طنجة باش يلعبو الفينال ديال كأس إفريقيا، وبدا تاني كايروج لهاديك الرواية ديال الاتحاد السنغالي لكرة القدم والمدرب بابي ثياو على أن المنتخب السنغالي بقى بلا حراسة بلعاني، مع العلم أن الاتحاد السنغالي براسو هو اللي اعلن فالتلفزة السنغالية ووسائل الإعلام ديال بلادو موعد وصول منتخب السنغال للرباط قبل الفينال، وهاذ الشي خلى جمهور السنغال يقصد لاگار باش يستقبلهم، وقال اللاعب: “وصلنا إلى محطة قطار الرباط، بوحدنا، بدون حراسة… كنا وسط الحشد، وكان الوضع خطير بزاف وحسينا بلي الماتش بدا من تما”.

وهضر اللاعب المنسحب هو وصحابو السنغاليين على حادث انسحابهم المشوه فالفينال أمام المنتخب المغربي، وعدم احترام قرار الحكم بعد إعلان ضربة جزاء للمغرب، وقال: “يمكن الانسحاب من التيران ما كانش احسن تصرف، ولكن ملي كاتظلم ومع ضغط الماتش وخصوصا الفينال… قالينا ساديو ماني نرجعو للتيران ونلعبو رجال والى خسرنا راه هادي هي الكورة وسمعنا لكلامو ورجعنا.