كود – وكالات//

تباعت وحدة من اللوحات الفنية ديال الرسام الفرنسي كلود مونيه بثمن وصل لـ10.2 مليون يورو فمزاد علني دّار ففرنسا هادي ربع يام من طرف مشتري مجهول، وحسب ما علنت دار المزادات سوذبيز، اللوحة اللي سميتها “فيتوي، تأثير الصباح”، ترسمات عام 1901، كانت حتى هي من الأعمال اللي تعاود تكتاشفات مؤخراً بعد سنين طويلة، وكانو مقدّرين الثمن ديالها ما بين 6 و8 مليون يورو، ولكن فاقت التوقعات بشكل كبير.

اللوحة كتركّز على مناظر طبيعية، وكتبيّن بالخصوص الطريقة اللي كان مونيه كيعالج بها الضوء الطبيعي، خاصة كيفاش كينعكس فوق الماء، وهاد الشي كيعكس التطورات اللي عرفها الفن الانطباعي فداك الوقت. وبهاد البيع، تسجّل رقم قياسي جديد ففرنسا بالنسبة لأعمال مونيه اللي كتباع فالمزادات.

وفنفس المزاد، تباعت لوحة أخرى ديالو سميتها “جزر بورت فيليز” اللي راجعة لعام 1883، بثمن وصل لـ6.45 مليون يورو، حتى هي فاتت التقديرات اللي كانت ما بين 3 و5 مليون يورو، هاد اللوحات بجوج كانو محفوظين فعائلات خاصة قرن كامل، وكيمثلو مناظر من نهر السين حدا منطقة جيفرني اللي عاش فيها الفنان.

وها هاد الأرقام الكبيرة، كيبقى الرقم القياسي العالمي ديال مونيه هو 110.7 مليون دولار، اللي تحقّق فواحد المزاد فنيويورك عام 2019.