كود الصويرة ////

البارح لخميس 27 يونيو 2024 كان افتتاح الدورة 25 من مهرجان گناوة بالصويرة. الافتتاح كيعكس روح هاد المهرحان. صورة لمغرب اليوم. كاين الثقافة المغربية ممثلة فگناوة والمعلم باسو. كاين العمق الأفريقي ممثلا ففرقة ايفوارية، كاين اندماج هاد الشي مع الفلامينكو. فيزيون زوين. إيقاع ورقص وجدبة.

قبل هاد الشي تكلمات نائلة التازي المديرة المنتجة للمهرجان. هدرات على دور الثقافة كرافعة للتنمية. كرائدة لنشر ثقافة السلم والتعايش. رسلات “رسالة تضامن كامل إِلَى فلسطِين” والى الشعب الفلسطيني” ورسالة سلام إلى العالم”.

بعدها خدا الكلمة وزير الثقافة والشباب مهدي بنسعيد. ما كان عندو ما يتقال وبغى يهدر. عليها خربقها. قال باللي “وزارة الثقافة تبقى دائما تدعم المهرجان لان الثقافة هو الإنسان والإنسان هو السلام”

زوينة هاد الإنسان هو السلام. ما عرفناش منين جابها.

هاد الشي كيبين باللي هاوي ماشي قافز. ما يمكنش تجي لمهرجان وترتاجل. ما يمكنش فين ما لقيتي مهرجان تهدر. خاص يكونو موجدين ليك مستشاريك خطاب مقاد باش ما ترجعش ضحكة بحال البارح