كود – كازا ///

حضر ملك إسبانيا مراسيم حفل تنصيب رئيس أوروگواي، ياماندو أورسي، رفقة عدد كبير من رؤساء الدول والحكومات، بحال رئيسي باراغواي، سانتياغو بينيا، والبرازيل، لويس إيناسيو لولا دا سيلفا.

الملك فيليبي السادس ترسل معاه بكل من يولاندا دياز، النائب الثاني لرئيس الحكومة ووزيرة العمل للي من اليسار الراديكالي “سومار”، كما حضر الحفل رئيس الدبلوماسية الإسبانية، خوسيه مانويل ألباريس. زعيم جبهة البوليساريو جاتو دعوة من النظام اللي كيدعم الأطروحة الانفصالية وجا كما عادتو. بحال هاذ المناسبات ما كيزگلهمش غالي، حيت عزيز عليه التصاور والضو ديال الكاميرات..

هاد الدولة دارت فالترتيب البروتوكولي لجلوس الشخصيات٬ ملك اسبانيا يگلس ومن وراه غالي. واش القضية صدفة؟ طبعا اللا. ما كاينش الصدفة فهاد الامور.

زعيم البوليساريو بان فصورة حدا ملك الصبليون تنشرات ف إنديبندينتي ومنصات وحسابات تواصلية متعاطفة مع البوليساريو، كما تم نشر صورة ليه مع يولاندا دياز المعروفة بعدائها للمغرب. الوحيد اللي رفض يكون معاه ف كادر ديال شي صورة هو الوزير خوسي مانويل ألباريس.

ملك اسبانيا ما تسوقش ليه. قضية التصاور راه ما غادياش تقلق الرباط. علاش؟ لان حكومة سانشيث الاشتراكية حسمات قرارها وختارت دعم مغربية الصحرا. الملك مع هاد التوجه. هاد غالي المنبوذ هو اللي كيقلب يبان ويتصور ويسوقوها صحاب اطروحتو