احمد الطيب كود الرباط//

علمت “كود” من مصادر برلمانية، بلي شاعل صداع كبير وسط البرلمانيين اعضاء لجنة المالية وكذا وسط فريق التجمع الوطني للأحرار فمجلس النواب، بسباب الطريقة اللي كدبر بها زينة شاهيم لجنة المالية، واللي ولات كتوصف فالكواليس بانها “نكرة” سياسيا، بسبب ضعف الكفاءة ديالها وقلة الفعالية فـ تدبير وحدة من أهم اللجان فالبرلمان. خصوصا وان للي حطها ف لجنة المالية هو محمد شوكي، رئيس الفريق الحالي للاحرار لي بان ضعيف بزاف فالدفاع عن الحكومة خصوصا فالبرامج التلفزية الحوارية. عندو زهر كبير هاد الشوكي

شاهيم، دارو عليها الانتقادات كثر بعدما بانت ف فيديو ف صالون “VIP” ديال ماتش الوداد ضد إشبيلية فمركب محمد الخامس فكازا ول البارح، واللي حضرات فيه قريبة بزاف من البرلماني هشام آيت منا، اللي هو حتى هو من الأحرار ورئيس الوداد وما جاب للنادي والو هاد العام. هاد الظهور كان مبرهش خلق الجدل وسط الفريق البرلماني، بحيث كيتقال أنها ما بقاتش كتفصل بين السياسة والكورة وبين الصداقة والمسؤولية….. وديما هاد جوج كيبانو مع بعضياتهم سواءا ف الكورة دبا وسواءا ف السياسة ف لجنة المالية.

ايت منا ديما حاضر للجنة المالية غير باش يدعم زينة شاهيم، للي اصلا خدات رئاسة لجنة المالية فظروف غريبة، خصوصا بعدما دارو ليها الما والشطابة فالتعديل الحكومي وحطو لحسن السعدي بلاصتها فكتابة الدولة المكلفة بالصناعة التقليدية.

زينة، اللي ترأست لجنة المالية فهاد الولاية، ما قدرتش تنجح فمهامها، خصوصا أنها فشلت ف عقد اجتماعات للجنة من بعد ما داز قانون المالية، وما جاوباتش على أزيد من 120 طلب من المعارضة، اللي ولات كتهم الحكومة ب” احتقار للبرلمان وتضييع للمال العام” بسباب تصرفات شاهيم.

فاجتماع اللجنة ديال المالية لي كان نهار 10 مارس 2025، المعارضة هاجمات شاهيم بشكل مباشر. رشيد حموني، رئيس فريق التقدم والاشتراكية، قال: “مايمكنش نبقاو نتسناو والحقوق ديال المعارضة كتتهضم، وهاد اللجنة ما بقاتش خدامة”.

حتى نور الدين مضيان من حزب الاستقلال زاد: “الوزراء ما كيحضروش، والدستور كيفرض عليهم يجيو، ولكن لا حياة لمن تنادي”.

زينة ماعرفاتش ترد، وبدات كتخبط فالهدرة، وهادشي زاد كيبان أنها ماقادراش تساير حجم المسؤولية، وأنها مجرد “وجه حزبي” دافع بها شوكي وصافي وبلا فعالية تذكر.

الأخبار اللي كاتروج من داخل الحزب، كتكشف أن زينة شاهيم كانت مرشحة باش تدخل الحكومة فالنسخة الثانية، وكانت مطروحة تكون وزيرة.
لكن فآخر لحظة تقصات من اللائحة، وكتقول مصادر من داخل الحزب أن السبب كيرجع لبعض التصرفات اللي تحسبات عليها، وخلات القيادة تراجع قرارها، وهو ما فتح الباب قدّام الشاب يونس السعدي اللي طلع بلاصتها فاللائحة الحكومية الجديدة.

هاد المعطى زاد ضعف موقعها داخل البرلمان، وخلى بزاف فالفريق ديالها يشوفو أن وجودها على راس لجنة المالية مجرد تحصيل حاص وقرار داخلي خصو يتراجع.

فهاد السياق، كاين حديث على انتخابات داخل اللجان وبلي ممكن يتم تعويض شاهيم باسم اكثر حضورا وعندو توافق داخلي، مع العلم انه كانت تجربة سابقة من نوعها ف انتخاب رئيس لجنة ف ظروفك معينة، فحال استقالة هشام المهاجري من رئاسة لجنة الداخلية. هاد المعطى خلى بزاف ديال النواب يسولو: “واش الدور جاي على لجنة المالية؟ واش الأحرار غادي يبدلو شاهيم؟”

مصادر من داخل الحزب كتشير أن هادشي ماشي مستبعد، خصوصا فظل تزايد الضغوط، وكثرة الانتقادات من الداخل، وضعف حضورها فالساحة التشريعية، وقربها المثير للجدل من آيت منا، اللي اصلا كيحضر للجنة المالية حيث ملايري وغير هادي راها تضارب مصالح.

دبا بقاء زينة شاهيم على راس لجنة المالية، ولى محل نقاش كبير، وقد يكون من بين التغييرات المقبلة قبل مناقشة مشروع قانون مالية 2026، اي السنة الانتخابية.