كود سعيد الشاوي كازا //
علمت “كود” ان عامل عمالة النواصر عبد الله شاطر رسل مصالحو وجابو طونوبيلة من نوع “اودي أ 4″ وسد عليها فالعمالة. هاد الشي دارو بعد ما تم عزل رئيس الجماعة هشام غفير واحيل على المحكمة الادارية وخدا فبلاصتو كيف كيقول القانون النائب الاول عبد الله بنهنية. لكن وفق تصريحات منتخبين ل”كود” هو تصرف العامل اللي وصفو احدهم بالسلوك “غير المسؤول” من قبل شاطر. وباللي هادا “حجر على المنتخب” لان الطونوبيلة ماشي ملك عائلة شاطر بل ديال الجماعة
منتخب اخر اعتابر هاد الشي ل”كود” بالتدخل السافر” فامور ما عند العامل علاقة بيها. المصدر قال ل”كود” باللي القانون ما كيعطيهش الحق ياخد طونوبيلة ديال الجماعة وباللي الحالة الوحيدة اللي مخولها ليه هاد القانون هو يدي الطونوبيلات للمحجز ماشي لكراج العمالة وحتى فهاد الحالة راه محددة بوضوح فالقانون
مصدر اخر تهكم على هاد العامل وقال ل”كود” “كون السيد العامل دار خدمتو ما يوقعش اصلا عزل الرئيس. راه اي تصرف كيديرو رئيس جماعة كتكون الداخلية من الباشا حتى العامل علي علم بيه وعارفاه ولكن ديما كتجي فالمنتخب. واضاف هاد المصدر ل”كود” “السي شاطر يرجع الطونوبيلة ويمشي يشوف هاداك الحمام اللي كيهدد حياة لمغاربة وللي ماليه كيتعناو بللي عندهم ناس فالرباط
